Hard Grooves ta bay ta anfitrion e diasabra aki di e prome presentacion “Live” di Frankie & The Flatz. Cual ta un banda di rock cu ta toca exitonan di 60, 70, 80, 90 y contemporaneo.
Manager di e banda Ruben Croes a splica cu e banda a cuminsa na 2019 pero e pandemia a causa cu nan no por a haci presentacion tur e tempo ey. Cu e reglanan suavisando poco poco, Frankie & The Flatz ta riba escenario diasabra awo. E ta un banda cu musiconan hopi versatil y cu ta toca un variedad di exitonan di varios genero entre otro Rock, Pop, New Wave y Reggae pa menciona algun.
E Banda a cuminsa durante un conbersacion entre Giovanni “Fang” Ras, Stuart Willems y Ruben Croes mes na final di 2019. E meta tabata pa crea un banda cu musiconan experiencia y cu flexibelidad suficiente pa por handle cualkier piesa cu pone nan dilanti. Stuart Willems despues a tuma contacto cu Armando Villasmil y Edward “Dido” de Cuba pa forma e seccion ritmico di Frankie & the Flatz.
Na final, despues di hopi buscamento, a logra cu Suriany de Mey a uni su mes na e banda como vocalista. Croes a conta cu Fang Ras ta director musical y ta forma e duo cu ta toca guitara cu Stuart Willems. Armando Villasmil como bahista y Dido de Cuba ta riba drums. E combinacion ta tremendo y cu e stem imprecionante di e talentosa Suriany, e publico por conta riba un tremendo presentacion di Frankie & The Flatz.”
Diasabra 13 di november pa 9:00 pm, Frankie & The Flatz ta cla pa deleita e publico den Hard Grooves Jazz Café cu un tremendo repertorio caminda e publico lo compronde dicon nan lema ta: “We got Music!”
Hard Grooves ta keda na Blauwe Steeg 11, cu ta keda net band’i panord di Flor de Oriente cu ta patras di edificio Corte na Oranjestad.
