Desde ayera a cuminsa circula diferente informacion riba posibel variante nobo di COVID-19 XBB.1.16 cu lo ta na Aruba y cu ta hopi peligroso. Directie Volksgezondheid Aruba (DVG) ta informa cu e informacion aki no ta corecto. E variante XBB.1.16 no ta nobo, e ta conoci for di luna di april y alcontrario na e informacion cu ta circula, ta duna sintomanan hopi leve. Na Aruba DVG ta sigui registra pa siman casonan positivo di COVID pero no tin motibo na e momento aki pa lanta e preocupacion den comunidad mirando cu e cantidad di casonan ta limita (7 pa siman) y mayoria caso di COVID ta recupera sin ningun complicacion.
Banda di COVID, tambe ta circula riba nos isla otro virusnan manera Adenovirus, Rhinovirus A/B/C, Parainfluenza virus, Metapneumovirus y RSV cu ta duna sintomanan manera entre otro:
• Dolor di garganta
• Keintura
• Tosamento
• Congestion di sinus
• Diarea y/of sacamento
• Dolor di cabes/dreymento di cabes.
DVG ta observa cu den mayoria caso di sintomanan respiratorio Rinovirus y Metapneumovirus ta afectando mucha entre edad di 0 pa 17 aña mientras di otro banda COVID ta afectando esnan entre edad di 18 aña cu 65 aña of mas. Departamento di Salud Publico, cu ayudo di diferente partners continuamente ta monitor pa medio di sentinel pa virus cu por ta circula y causa molester of menasa pa salud publico di Aruba.
DVG ta conseha comunidad pa sea mas consciente di nan higiena di man, evita contacto cu hende cu ta malo cu sintoma di griep, come mas fruta y berdura, bebe hopi awa y bebe suplemento cu por yuda hisa defensa di e curpa.
