Aruba Trade and Industry Association (ATIA) ta scuchando hopi riba e tema di RAFt (Rijkswet Aruba Financieel toezicht) y kico esaki lo significa pa economia di Aruba, specialmente si Gobierno di Aruba y Hulanda no yega na un acuerdo.
E articulo aki ta solamente pa analisa cuanto extra e lo costa pueblo y economia di Aruba si no yega na un acuerdo cu Hulanda.
Condicion pa fianza di sosten pa COVID-19
E RAFt ta un condicion pa un interes rebaha y mas faborabel cu interes riba mercado liber, pa por paga bek e debe di aproximadamente 900 miyon florin cu Aruba a presta di Hulanda den temporada di pandemia. Tecnicamente, e debe aki mester ta paga na october venidero, pasobra e fianza tabata un asina yama “bullet loan” unda cu ful e suma mester ta paga bek den un solo biaha.
Diferencia di refinancia cu Hulanda of riba mercado liber
Den un entrevista via un plataforma local (NoticiaCla), Secretaria di Estado van Huffelen a informa cu Hulanda ta dispuesto pa refinancia na un interes faborabel di dos pa tres porciento, pero si no yega na un acuerdo, cu Aruba lo mester bay fia riba mercado liber na un porcentahe di 8 pa 10%. Na Aruba e ultimo tanda di bono saca door di Gobierno tabata na 6.5%, cu ta mas cu dobel kico Hulanda lo ofrece.
Consecuencia si refinancia riba mercado liber
E manera mas facil pa splica ta cu cada porciento di interes lo costa Aruba nuebe miyon florin pa aña pa por lo menos e proximo binti aña. Pues si Hulanda refinancia na 2 of 3%, e lo costa Aruba entre Afl. 18 y 27 miyon pa aña. Si refinancia riba mercado liber, entre 6 y 10% e lo costa Aruba:
Pues e diferencia entre mercado liber y un refinanciamento cu Hulanda por ta un peso significante riba presupuesto di Gobierno di Aruba. E tabla akibou ta mustra e diferencia entre diferente porcentahe si firma e RAFt na 2 y/of 3% y si presta riba mercado liber na 6, 7, 8, y 10%.
Manera por conclui di e tabla ta cu dependiendo na ki porcentahe e fiansa di 900 miyon florin ta refinancia, lo tin un efecto impactante.
Di unda Gobierno lo saca fondo pa repaga?
E pregunta cardinal lo ta, di unda Gobierno di Aruba lo bay saca e fondonan extra pa por paga e interesnan (y fianza) aki anualmente, sin cu e tin cu bin cu mas medida pa pueblo y comercio. E lo ta na beneficio di tur hende biba riba nos dushi Aruba pa Gobierno bin na un areglo of consensus cu Hulanda, pa por haya un porcentahe di interes faborabel. Si no por firma e RAFt manera e ta awo, kisas un opcion ta pa firma e RAFt cu un clausula temporal unda por renegocia e termino nan aki algun aña ora cu a cumpli cu tur rekisito. Asina Aruba por gara mas forsa economico den algun aña, sin extra medida cu ta tranca crecemento di nos economia.
ATIA
Aruba Trade and Industry Association (ATIA) ta funda na aña 1945 y ta e organisacion principal cu ta representa e empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association.
