Nos muchanan vulnerabel entre edad di seis luna te cu cuater aña cu a nace cu e malesanan hereditario of defecto di nacemento, anteriormente no tabata por tabata proteha contra COVID.
Nos muchanan vulnerabel tabata core e risico di keda contagia cu COVID na scol of cualkier caminda cu nan bay cu tur e consecuencianan pa nan. Hopi di e muchanan aki debi na nan condicion di salud asina comprometi, e mayornan tabata prefera di wanta nan mas hopi posibel na cas pa minimalisa e risico pa keda contagia cu COVID.
Pa e muchanan aki y nan mayornan ta un alivio pa sa cu entrante awe 2 di mei 2023 tin un vacuna di Pfizer disponibel special pa mucha entre e edad ya menciona y bou condicion specifico. Pa un mucha cu condicion di salud por ricibi e vacuna aki ta necesario pa dokter specialista di mucha receta esaki. Cu e receta aki e mayor ta trece su yiu na Seccion di Malesanan Infeccioso di Departamento di Salud Publico situa na Avicenna straat #1 pa e mucha por ricibi su vacuna, ta trata aki di un serie di tres vacuna.
Despues di e prome vacuna mester warda cuater siman pa haya di dos vacuna y despues mester warda ocho siman pa di tres vacuna. Ta hopi importante pa na momento cu e mucha ta bay ricibi e vacuna di COVID e mucha tin mas cu dos siman cu e no a ricibi ningun otro vacuna y tambe despues di ricibi e vacuna di COVID mester warda dos siman prome cu por ricibi cualkier otro vacuna. Pa muchanan e entre edad di cinco cu diesun aña cu tambe ta sufri di un of otro condicion di salud cu a ricibi anteriormente vacuna caba, ta recomenda awo un booster shot.
Malesa of condicion di salud bou cual nos muchanan ta bin na remara pa ricibi e vacuna di COVID ta e.o.
· Malesa cardiovascular;
· Malesa di pulmon y di e sistema respiratorio;
· Malesa di riñon;
· Malesa di stoma, tripa, higra y mas.
Pa mas informacion mayor por consulta cu specialista di mucha cerca ken e mucha ta wordo controla of ta bou tratamento.
