“N’e momentonan aki indice di importacion riba carni, galiña, fruta, berdura, aros y batata ta 0%. Ora bin BBO na frontera e importador tin cu bay paga 7% riba e productonan aki di prome necesidad y tur otro producto. Gabinete Wever-Croes ta bisa cu despues nan ta haya esaki bek. Ta un “voorschot” e comerciante ta duna gobierno. Esey t’e supuesto defensa cu e 7% BBO na frontera lo no tin efecto riba e prijs.
Pa cuminsa e 7% BBO cu tin caba ta keda. E 7% BBO na frontera ta un medida adicional. E argumento cu BBO na frontera lo no tin impacto riba prijs ta un engaño di marca mayor”, asina e lider di fraccion di AVP, mr. Mike Eman a reacciona riba e BBO di 7% na frontera cu lo ta introduci prome di juni 2023. E ta sigui splica e motibo pa cual lo mira impaco di e 7% di BBO na frontera den e prijs di producto.
PRE-FINANCIAMENTO DI 7% BBO NA FRONTERA
E lider di fraccion di AVP ta splica cu e importador/comerciante cu tin cu adelanta e 7% di BBO aki tin cu fia e cen na banco na un interes basta halto. Ta mas cu logico cu e gastonan aki lo ta pasa den e prijs di tur importacion. Cada comerciante lo husga pa nan mes ta cuanto nan lo aumenta e prijs pa cubri nan gastonan di pre-financiamento di gobierno. Cu lo tin speculacion tambe den esaki ta evidente.
Historia a demonstra esey. Cada insiguridad fiscal y socio-economico ta haya nan refleho den un aumento di prijs. Gabinete Wever-Croes mes ta contradici su mes cu e medida aki lo no tin efecto riba prijs ora cu nan ta calcula e entrada astronomico di 40 miyon extra pa caha di gobierno cu e medida aki. E medida aki pa crea e supuesto “level playing field” lo ta carga emberdad parcialmente door di importado grandi, manera hotel, cu awo no ta paga BBO, pero tambe door di pueblo en general cu lo sufri otro sla riba costo di bida.
SLA RIBA SLA PA NOS PUEBLO
Mike Eman ta lamenta cu desde cu Gabinete Wever-Croes a sinta, pueblo ta haya sla riba sla. Den nan promer aña caba nan a redobla BBO. Despues tras di otro pueblo a haya mas golpi di Gabinete Wever-Croes: BBO a aumenta na 7%; nan a hay’e na 3%. Awo ta bin 7% BBO na frontera riba dje. E efecto minimal di e peso di BBO, incluyendo BBO na fronera, riba producto cu ta pasa tres schakel lo ta 25% di aumento riba prijs cu ta bin halto caba di afo. A aumenta prijs di awa y coriente cu 30%; a aumenta schoolgeld barbaramente; a introduci impuesto riba salario ficticio di directo/accionista chikito; a introduci BBO obligatorio p’e empresanan cu tin un entrada riba 4200 florin pa luna.
Roomtax a subi cu 33%; a kita 40 miyon florin for di fondo di promocion di turismo. A kita descuento riba accijnz riba gasolin y diesel. Gabinete Wever Croes a fia 900 miyon florin di Hulanda y a cobra e ultimo 5 añanan 1500 miyon florin extra na medida. Kico pueblo a mira di esaki ? Nada pero nada.
Tur rond di Aruba ta constata deterioro di scol, bario, cancha deportivo, caretera y edificio. “Nada di inversion y nada di mantencion. Locual e Presidente di Banco Central e tempo ey a bisa na 2008 di otro Gabinete di MEP cu Aruba ta experenciando un sociale y fysieke verpaupering awe ta bira e realidad doloroso atrobe pa nos pueblo”, e lider di fraccion di AVP, mr. Mike Eman a finalisa enfatisando.
