Pa añanan largo Ing. Richard Dijkhoff, Presidente di AVB, a anuncia cu mester dal e stapnan pa profesionalisa e federacion. Esaki ta por lo menos un di e proyectonan cu a introduci y hunto cu e compania Dotcomsport BV di Hulanda lo bay haci posibel pa AVB introduci un sistema digital. Asina aki AVB lo por haci e trabou di coach, parti administrativo, ful e campeonato, lo haci esaki digital.
Si ta custumbra cu papeleo, awor dentro di poco esey lo pasa pa historia! Pa haci esey posibel mester di partnernan profesional cu conocemento y amplio experiencia riba e tereno aki. Den cuadro di esaki a acerca Dotcomsport BV di Hulanda, pa desaroya un app den telefon di tur e coachnan, managernan, hungadonan y dirigentenan di AVB…un sistema di “spelervolgsysteem’. Di e forma aki por sigui tur desaroyo y progreso di e hungadonan y e coachnan di Aruba.
Durante e anochi di Balon di Oro, tabatin e bunita momento cu por a firma un MoU pa concretisa cu dentro di poco ta finalisa e proyecto aki. Ta pone futbol na un nivel mas halto y ta profesionalisa e organisacion mas ainda.
Mester menciona cu ultimo añanan, desde postulacion di Ing. Richard Dijkhoff na cabes di AVB, mesora el a conta cu sosten incondicional di FIFA, di CONCACAF y di KNVB di Hulanda. Hunto nan a pone tempo, conocemento, experiencia y hasta fondo disponibel pa Aruba. E diferente ta notabel awor cu pocopoco ta cosechando e frutonan di tur e biahenan, reunionnan, participacion na congresonan, tayernan y reunionnan importante cu partnernan internacional riba e ramo aki. Awe Aruba ta na un crusada historico di desaroyo innovativo den e deporte rey, Futbol!
