Dosis di Speransa a yega Curaçao Medical Center

Speransa por bin den hopi diferente forma i awe djaweps 25 di febrüari esaki a yega Curaçao Medical Center (CMC) den forma di e Bakuna di Pfizer BioNTech COVID-19. Gilbert Martina, direktor interino di CMC, Dr. Jeanne Koeiers, Intensivita i Presidente di Outbreak Management Team (OMT), Dr. van der Huls, hefe di departamentu di ARBO na CMC i Dr. Sandra Cova (Hefe di tim di
kalamidat di CMC i spesialista hiperbáriko) a risibí e entrega históriko akí.

Ta trata di e promé 300 di un total di 882 bakuna disponibel pa CMC. GGZ ta responsabel pa warda, deskongelá, i entregá e kantidat di bakunanan nesesario pa CMC riba e dianan asigná pa bakuná di akuerdo ku proseduranan di seguridat.

Ayera, dos miembro di Kuido di e tím di CMC, Dr. Vanessa Marcha (Ginekólogo) i Roshendly Martina (Enfermero di Emergensia) a bakuná komo un di prome miembronan di nos komunidat huntu ku vários influencers di nos komunidat na SEHOS. I awe CMC a kuminsá e trayekto pa tur sobrá personal den kuido. “Nos a risibí algún di e promé pashèntnan ku COVID pues nos ta literalmente den ‘Frontline’ for di komienso di e pandemia. Nos a mira doló, tristesa i tambe pashèntnan i nan famianan desesperá. Ta
importante pa nos bakuná nos mes pa nos por sigui yuda nos komunidat,” Roshendly a bisa.

CMC a lansa un proseso di bakunashon intensivo pa su personal ku ta kai bou di e grupo di “Front Liners.” Hospital a plania pa bakuná un máksimo di 300 personal pa dia entrante di awe i ta spera di por bakuná entre 600 i 700 persona durante e próksimo 3 simannan. Esaki ta inkluí e rekerimentu di e di dos dosis entre 17 -21 dia despues di e dosis inisial.

Den e fase inisial di akuerdo ku instrukshonan di GGZ, e bakuna ku lo wòrdu suministrá den CMC ta disponibel solamente pa personal di CMC ku ta kore riesgo pa eksponé nan mes na Covid-19 durante trabou. Na momento ku mas bakuna bira disponibel, CMC lo por sigui ku e siguiente fase di bakuná kual ta enserá personal ku no ta den kuido. Esaki di akuerdo ku GGZ. “Tur nos preparashonnan a pone ku nos por a yega na e momentu tan sperá aki. Nos tin speransa ku huntu ku e mantenshon di medidanan di prekoushon manera tapa boka, distansia físiko i e rekomendashonnan di higiena di man, ku nos lo mira e benefisionan di e bakuna den e próksimo lunanan”, Dr. Koeijers ta bisa.