Diasabra anochi alrededor di 8:30 pm Polis di Bario di Playa tabata bezig cu un proyecto den cayanan di Village. Ta na momento cu nan a ricibi un yobida di piedra riba e auto di patruya. Varios hoben tabata tira polis cu piedra. Mesora a pidi refuerso debi cu ta varios persona a core bay ora a mira polis.
Na dado momento mayoria di nan a bay sconde den un cas na Caya St. John. Polis a rondona e cas aki y mucho e hobennan no por a haci. Dos di nan no a conta cu polis tin mas condicion cu nan mirando cu a start un persecucion na pia y a logra detene dos di nan.
Cu yudansa di helicopter polis a logra domina e situacion den un rato di ora. A confisca dos bais y a transporta e hobennan pa warda di polis caminda nan tin di bay duna cuenta na un subfiscal di nan acto.
