ATA a percura pa dentro di poco Aruba ta riba plataforma internacional cu un serie di documentario titula “The blue Lizzard Effect”. Diabierna anochi tabatin un evento, prome cu e lansamento di dialuna awo, di e documentario aki na sede di Fundacion Parke Nacional Aruba.
Na Colombia tambe tabata tin un otro evento cu a conta cu presencia di rond di 35 medio di comunicacion nacional y internacional presente pero tambe ehecutivonan di HBO y Max.
E tabata un evento special na unda a invita tur e aerolinea y operadornan di tour cu ta traha cu Aruba. Y memey di e sala yen di hende por a mira cara di algun di e personalidadnan cu ta aparece den e video manera e presentado internacional Jason Silva, Kyra Hoevertsz y Nichole Danser.
Mas bunita tabata e apoyo ricibi di mas cu dies Rubiano cu a acudi na e evento na Bogota.
A combersa cu Jordan Schlipken Croes, Area Director Latin America pa Aruba Tourism Authority, kende a comparti algun informacion y mustra hopi satisfaccion pasobra cu e produccion aki lo percura cu Aruba lo aparece riba tur e plataformanan di HBO / MAX. Un documentario graba na nos isla.
Ta papia aki di un docuserie, filma na Aruba riba con e habitantenan ta biba, con e cultura ta. E documentario lo ilustra con e bida na Aruba ta, e elementonan cu ta forma parti di e bida di tur dia riba e isla, manera entre otro: cultura, historia y tradicion.
Presentado internacional Jason Silva a entrevista diesdos Rubiano conoci na Aruba cu lo comparti nan experiencia di biba na Aruba, nan interesnan, con nan ta feliz aki riba y kico ta haci Aruba diferente pa nan. E contenido ta mira no for di e perspectiva di e turista (bishitante), pero for di esun di e residente.
“E ta un proyecto cu e strategia tras di esaki ta hopi diferente di loke e companianan normalmente ta purba promove (comercial) pa convence e turista bini Aruba. Cu e produccion (documentario aki) kier a haci algo mas organico. Por medio di e personanan di Aruba tabata kier pa e turista biba e experiencia di Aruba di un forma cultural o filosofico.”
ATA ta sinti cu e concepto aki, diferente, lo hala atencion di hopi persona cu kier biba e experiencia mustra den “The Blue Lizzard Effect”.
E bon di esaki ta cu a asocia cu HBO/Max cu ta un di e plataformanan mas grandi di mundo. Pues e proyecto lo sali den tur mercado Latinoamericano, na Hulanda, Italia y Inglatera. Pero tambe na Merca pa un tempo limita. “E impacto cu esaki lo bay tin pa nos como Aruba en general ta super positivo.”
Evaluacion haci ta mustra cu 155 miyon persona lo por mira e documental aki.
Localmente e serie di documentario lo disponibel entrante 17 di april 2024.
