Den centro di ciudad tin un negoshi nobo cu a habri su porta. Ta trata di Sip 23 Lounge. Dilanti algun invitado Michelle de Freitas a corta e cinta p’asina Sip 23 Lounge a habri su portanan oficialmente, unda tur presente a pasa un rato agradabel.
Michelle de Freitas, propietario Sip 23 Lounge, a expresa di ta sinti bon, pero di ta orguyoso di su mes cu por fin a logra su meta. Pa dos anja de Freitas tin e meta di tin su propio negoshi. E nomber Sip ta bin door cu ora bo dal un sip, mientras cu 23 ta e fecha di su cumpleaños, cual ta 23 di november. El a scoge pa pone Sip 23.
Sip 23 ta situa den caya Blauwesteeg, net pabou di e edificio di Kinikini. Sip 23 ta e luga cu bo mester yega pa disfruta hunto cu famia, amistad y pasa un momento agradabel. Bo por scoge pa sinta paden of pafo.
De Freitas a splica cu e parti paden di e luga ta un lounge bar, pero nan ta bay habri tambe e parti di dilanti. Awe nochi mes tin e prome evento cual ta brassband, carnaval girls. E luga aki ta uno diferente pa Aruba.
Tur anochi ta bay tin diferente tema. Diasabra anochi ta noche de vallenato. El a indica cu nan kier pone ambiente na Aruba como hopi evento, p’asina hende por relaha y pasa momento agradabel. diadomingo nan ta bay tin Sip BBQ, cual concepto ta cu bo ta yega y por sip, y na mes momento bo por cumpra un dushi BBQ.
E luga ta habri di diamars pa diadomingo, e orario ta di 4:30 pm te cu 12:30 am den siman, mientras cu den fin di siman ta habri te cu 2:30 am. Ta bay tin diferente tema manera ladies night, karaoke night, carnival night. Aworaki nan ta bezig cu special pa Dia di Rey.
Pa loke ta e buckets tin bon prijs. Segun de Freitas, e prijs ta esun mas abou, di cual e Chill ta 32 florin y Balashi ta 30. Asina ta yega awe nochi na Sip 23 y disfruta di e ambiente.
