E hecho aki a tuma luga un poco mas cu dos aña pasa. Pero te cu na final di 2022 e hoben denunciante a sinti su mes suficientemente fuerte pa haci un denuncia contra e homber den cual tanto su persona como e mama tabatin masha confiansa. E mayornan a confia nan yiu den man di e instructor di baile masculino aki di 22 aña pa despues descubri cu el a manipul’e y domin’e durante ocho luna largo. Un periodo durante cual el a tene relacion sexual cu e mucha muhe menor di edad, di 14 aña. Y a pone haci hopi cos tras di lomba di su mayornan. Ta trata aki di e instructor di baile Dijon Inesia, kende awe ta deteni y cera den KIA sperando pa su caso bini dilanti mesa berde. Hamas, segun e mama a conta nos por a sospecha cu e homber aki tabata un pedofiel, ta un persona cu ta gusta menor di edad. “Cualkier persona cu para su dilanti of anda den su circulo lo no sospecha nada. El a mustra semper un persona hopi lief cu tur esunnan cu a participa den su lesnan di baile of den su grupo di fitness,” e mama a bisa. E tabata brasa tur hende.
Y incluso, despues cu el a manipula e mucha muhe di 14 aña den un relacion sexual, el a trata di mantene den un circulo unda e semper tabata presente. Na les di baile, na e ehercicionan di fitness y hasta ora e mucha muhe tabata haya bijles cerca un amigo di dje, na cas di e mucha mes, e tabata presente. E mama ta conta cu hamas el a laga su yiu sali su so cu e homber aki, aunke cu el a puntra varios biaha permiso pa e bay na cierto luga. Cada biaha e contesta di e mama tabata no, pasobra e mes ta hiba y busca su yiu. Semper, e mama a conta, e tabatin confiansa unda e tabata hiba su yiu les di baile, esta cu e grupo di Popcorn Dancers. Di e Manager y e grupo di baile mes, e no tin nada di bisa. Freddy semper tabata un persona recto. E no tabata laga ningun hende desvia y tin biaha ta bay te na auto pa mira cu kende e alumno ta bay cas bek, si ta e mesun hende cu a trece.
Ta despues, e mama a bin topa Freddy, den luna di december aña pasa y a bin descubri loke cu a pasa. Propietario di e grupo a bisa e mama pa casualidad “ah bo a corta nos orea. Bo yiu a bay cu otro grupo Corsou”. Y asina a bini dilanti cu el a menciona algo manera cu lo tin un relacion entre e menor y e instructor di baile, algo cu e mama mesora a cuminsa cuestiona. Y asina a bini dilanti algun cos cu a pone e mama compronde kico tabata pasando. Freddy a conta con un biaha cu e no por tabata presente, el a laga un hende atras pa controla p’e. Y e persona aki a habri porta di un area y a mira Inesia bula atras di biaha. Naturalmente e mucha homber a conta Freddy e movecion sospechoso. Inmediatamente Freddy a yama un reunion unda cu a bisa e instructornan cu nan tur ta adulto y mester tene cuidao pa no mete cu menornan di edad. Y a mustra nan riba e consecuencia di esaki. Pero como cu el a mira e mama tabatin un asina bon relacion di amistad cu Inesia, cu el a pensa e mama tabata sa.
Tabata manera cu tur cos a cay den otro riba e mama e momento ey. “Mi a bin compronde tur e estadonan emocional cu mi yiu tabata pasando den dje.” Den e periodo ey e menor a cuminsa sufri di ansiedad cu a caba den atakenan di panico, den forma continuo. “E mes a bisa mi cu e mester di un psycholoog pa papia cu ne, pasobra e ta sinti cu e no ta bon.” Mientras cu tur esey a pasa, ainda e mama no tabata sa tur loke cu e yiu a pasa aden. “Awe, despues di guia di psycholoog, mi a realisa cu loke a pasa, no tabata mi fout. Mi tabata na un edad vulnerabel, unda ya caba mi tabata pasa den situacion di cambio y no a realisa cu loke e homber a haci cu mi no tabata normal. Nunca mi a mira algo malo den dje. Ocho luna largo el a pone mi gañ mi mama, sconde cos pa mi mama y mi a kere ta normal. Hasta su amigo, a trata di mustra mi cu loke tabata pasando ta normal, pasobra Dijon ta completamente namora di mi.” E hoben a conta cu e prome biaha, nan tabata den les di baile. E tabata para mas atras y diripiente e homber a want’e y a hal’e atras, di un muraya.
El a cuminsa bras’e y dun’e sunchi. Algo cu nunca el a experencia prome. E homber tabata haci tur e cosnan ey cu ne, ora cu diripiente luz a bay. Esey tabata momento cu el a penetr’e. Y despues e tabata haci mesun cos of tabata sa momentonan cu e tabata bay un caminda y e ta presenta eynan. “E tabata haci manera loke ta pasando entre nos tabata normal. Y mi tambe a kere esey.” Te ora cu su curpa a cuminsa reacciona cu atakenan di ansiedad y panico. “E momento ey mi a realisa cu mi mester ayudo pero mi no tabata prepara pa conta mi mama.”
Sinembargo asina cu e mama a tende for di Freddy loke e tabata sospecha, a bay cas y a puntra su yiu di biaha si e kier papia. Asina el a bash’abou. Riba e pregunta di su mama, si e ta dispuesto pa haci un denuncia, su contesta tabata afirmativo. “E momento ey mi a realisa cu loke a pasa no tabata mi fout. Mi no sa si el a yega di haci mesun cos cu otro muchanan prome of despues di mi. Pero loke mi kier ta sigur ta cu nunca mas e lo por manipula un otro menor y haci loke el a haci cu mi. P’esey mi a denunci’e. Mi kier sigui mi bida, pero mi mester cera e capitulo aki di mi bida,” e hoben a conta.
Henter e famia, despues di a scucha loke e menor a pasa aden, a bay di acuerdo pa bay bou guia di psycholoog. “E homber ta tapa su realidad hopi bon. Ni mi yiu cu tin un trabou cu ta anda cu tipo di echonan asina no a ripara nada ora cu e tabata na Aruba. Mi otro yiu muhe so a bisa cu e no a gusta Dijon ora cu el a cera conoci cu ne.” Pa mas di shete aña Dijon a duna les di baile. Despues di a haci denuncia aña pasa december, e famia no a tende nada mas di e caso. Te ora cu nan a bay averigua algun siman atras. Esey ta momento cu nan a bin tende cu e homber ta deteni for di final di juli te cu a mand’e KIA. “Esaki so nos a haya un tiki fastioso. E tin famia, cu kisas lo por a rabia cu e denuncia. Nos tabata kier sa, pa nos protege nos yiu por si acaso,” e mama a conta. E menor, kende awendia tin 17 aña, ta sinti cu el a cumpli cu su deber y ta sinti su mes fuerte awendia. E ta sinti cu despues cu el a sali di e circulo ey, el a busca ayudo na tempo y por cuminsa prepara pa e fase nobo den su bida. Pero loke e no kier ta pa ningun mucha pasa den loke el a pasa. Mas pasobra e homber durante tur e tempo aki, abusando di e confiansa y tampoco a protege. Incluso tabata filma e mucha muhe den su intimidad. “Mi kier pa si tin mas mucha a pasa den mesun cos, pa denuncia. Of si tin mamanan cu nan yiu tabata haya les for di e homber aki, pa papia cu nan yiu. Wak si algo por a pasa. No por permiti’e haci e cos aki nunca mas,” e menor a conta.
