Diahuebs 6 di october, Minister Arends a firma un MoU hunto cu Minister di Naturalesa y Nitrogeno di Hulanda Christianne van der Wal pa fortalece e colaboracion entre e paisnan di reino den area di e recursonan natural.
E MoU aki ta establece asistencia mutuo, colaboracion y consultacion den Reino y asina promove e comparticion di conocemento, e rednan di contacto y experticio ariba:
1. E proteccion, maneho, uzo di recurso natural.
2. Fortalecemento di siguridad di alimentacion door di desaroyo sostenibel di agricultura y pesca.
3. Participacion den y implementacion efectivo di tratado internacional relevante.
Minister Arends ta premira cu e fortalecemento nobo aki entre e paisnan di reino lo tin un impacto positivo ariba nos sector primario y e bienestar di nos recursonan natural. Pues cada pais den nos reino lo por siña y beneficia su mes di otro.
E MoU aki lo ta presenta n’e conferencianan di Convencion di Cartagena cu ta tumando luga riba nos isla e siman aki. E Convencion di Cartagena ta un tratado internacional cu ta destina pa proteha y preserva e medio ambiente marino y costal den e region di Caribe.
