Pueblo di Aruba prepara pa e di 4to edicion di Island Festival cu ta tuma luga e siman aki y, manera semper, den cayanan di San Nicolas.For di e prome edicion di Island Festival, den un concepto completamente nobo, esaki tabata un exito rotundo y cada edicion e exito aki ta ripiti.
E 4to edicion ta tuma luga riba diaranson, 25 di september, for di 7’or pa 10’or di anochi, unda cu ta combina diferente tipo di entretenimento pero tambe presentacion un variacion culinario grandi pa gusto di tur hende.E show di e anochi aki ta tuma luga den curason di San Nicolas y ta cuminsa pa 7’or en punto, unda cu lo sigui te cu 10’or di anochi cu presentacionnan continuo. 
Manera un tradicion, ta cuminsa cu musica crioyo di Sodo y Cuero, sigui pa un show historico cu semper ta capta atencion, principalmente di turistanan cu tambe ta subi pa San Nicolas. Den e show aki tin presentacion di Massive Brassban y The Popcorn Dancers. Riba loke nan ta yama e High Rise strip ta bay tin The Joyride Band tambe, kende a yega di duna presentacion den Island Festival caba. Un primicia di e anochi aki ta presentacion di Honey Pot cual grupo lo estrena nan mas reciente cancion “Blood, Sweat & Tears”, cual sigur lo bira un exito grandi.
Pa cera e anochi grandi aki y poniendo tur hende riba pia, DLS D’Licious ta bay presenta nan miho repertorio di 2019, cual na fiestanan ta hiba tur hende riba pista di baile.
Tur hende subi pariba awe, pasobra no ta cobra entrada. Bo por admira show, scucha of baila musica contagioso y tin un bar y cushina na gusto di tur hende. Island Festival ta un experiencia di e ambiente di San Nicolas.
