Diferente ley di impuesto lo conoce diferente cambio entre otro e ley di inkomstenbelasting/loonbelasting. Tin tres cambio importante proponi ariba tereno di inkomstenbelasting/loonbelasting. Mr. Luenne Pieters, Director di Departamento di Impuesto (DIMP) a repasa e cambionan “un pa un”.
E cambionan aki ta:
- Ta ahusta e “belastingvrijevoet” di Afl. 20.455 pa Afl. 27.751
- Ta elimina e dos grupo di tarifa existente (“Tariefgroep I en Tariefgroep II”)
- Ta simplifica y cambia e tabel di inkomstenbelasting/loonbelasting
Esaki ta nifica cu un porcion mas grandi di bo “belastbaarinkomen” ta wordo exonera ora ta calcula e inkomstenbelasting. Esaki ta conta pa tur contribuyente. Lo elimina e dos “tariefgroepen”cu nos conoce y lo simplifica di e tabel di inkomstenbelasting/loonbelasting cu ta bay di 14 unidad pa 4 unidad.
Ta importante pa menciona cu Aruba ta conoci pa tin un di e tarifanan di inkomstenbelasting/loonbelasting mas halto den Caribe, cu ta 58.95%. Den e proposicion di ley ta un solo porcentahe lo wordo aplica ora di calcula e inkomstenbelasting. E tarifa maximo ta baha di 58.95% pa 52%, pero e structura y/of e manera di calcula esaki a keda mesun cos.
Ora analisa e impacto di e cambio di ley ariba e grupo di contribuyentenan pa cu inkomstenbelasting/loonbelasting por conclui cu tin un grupo chikito di 666 contribuyente cu ta den “tariefgroep I” lo bay atras. Di otro banda tin un grupo grandi di 31.766 contribuyente cu lo conoce un rebaho di nan impuesto y 6.638 contribuyente cu lo wordo exonera di paga inkomstenbelasting of loonbelasting, pasobra e belastingvrijevoet a subi.
Den e categoria di belastingvrijevoet tabatin caba 22 mil cliente cu no tabata paga loonbelasting of inkomstenbelasting. Awor aki 6.638 cliente ta bin acerca, cu ta haci e grupo cu no ta bay paga inkomstenbelasting of loonbelasting, mas of menos 30 mil cliente di e 55 mil cliente cu tin registra.
E ehercicio aki ta costa gobierno cen mirando cu ta duna esnan cu un schouder mas smal un alivio di impuesto. Na otro banda lo mester por genera e entrada ey bek pa e cambio nan aki sosode budget neutral ariba nivel di finanzas publico.
Pa e cambionan proponi den e ley di Grondbelasting ta premira cu lo tin mas entrada cu lo bay drenta den caha di gobierno pasobra cu lo tin tarifanan mas halto aplicabel pa propiedadnan comercial y tambe esnan cu no ta biba na Aruba.
BBO, BAZV y BAVP tambe lo conoce algun cambio cu no lo tin un impacto financiero grandi ariba e entradanan di gobierno. Lo trata di elimina e discusion cu tin riba e tema si e BBO mester ta inclui den e prijs y no ariba e factura pa asina crea un competencia mas husto den prijs di producto. E prijs cu bo ta mira den supermercado lo ta e prijs tambe cu bo ta paga na caha. Lo propone un periodo di transicion pa acomoda e trabao pa cambia e prijsnan.
Pa loke ta invoerrechten y accijnzen tambe lo tin cambio, ora ta papia di tabaco y alcohol. Bo ta mira cu belasting, durante añanan ta wordo uza pa no stimula cierto comportacion y comportacion nan cu ta dañino pa nos salud.
Nos tur sa cu humamento di sigaria ta malo pa nos salud y uzo di alcohol den exceso. Esey ta pone cu a propone pa hisa e invoerrechten riba e dos tipo di productonan aki. E ta un recomendacion tambe cu IMF a haci den su rapport di october ultimo. Tambe IMF a propone otro cambionan cu den e di dos tanda di e reforma fiscal lo bay mira un tiki mas di cerca cu ta por ehempel awa cu sucu, cual ta juice, cu tambe ta haci daño na nos salud ora e uzo ta den exceso. Tin hopi hende cu ta sufri di diabetes, hendenan cu despues di esaki, cu no cuida, ta bay dialisa. E ta duna mas complicacion pa e comunidad di Aruba y gastonan di salubridad. Si bo kier stop un cierto comportacion, e ta un opcion pa bo hisa impuesto of hisa invoerrechten riba cierto productonan pa Bo no stimula consumo di esakinan.
Aunke cu nos tur sa,cu maske bo hisa prijs di un paki di sigaria, esnan cu di berdadtl tin un adiccion riba e tereno aki lo keda huma e sigaria, maske cu e prijs lo ta hopi mas halto.
Extra 30miyon?
Riba caya ta wordo papia cu Gobierno lo genera por lo menos 30 miyon extra di e reforma fiscal. Pieters no por a comenta ariba e cifra specifico pero a menciona cu lo genera suficiente entrada pa e cambio nan aki sosode budget neutral.
