For di Minister Ursell Arends, nos a compronde cu lo mester a cuminsa sondea pa Departamento di Impuesto (DIMP) cobra boet pa Aruparking. Durante conferencia di prensa diaranson mainta na DIMP, nos a puntra e director con leu esaki ta mirando cu nan tin un aña caba cu a reacativa parkeermeters pero no tin e parti di ehecucion.
Esey ta un topico cu DIMP ainda ta den combersacion segun e director mr. Luenne Gomez-Pieters, den e caso aki cu gobierno y DWZ, mirando cu AruParking ta un entidad riba su mes.
El a splica cu ta hopi dificil pa DIMP cobra boet pa un otro entidad cu ta para riba su mes. “Ta mescos cu si mi bay cobra boet pa Serlimar, of pa ATA, AHATA, pa un hende cu no a paga un suma. E ta hopi dificil.” DIMP kier coopera y pensa tambe riba mas solucion hunto, cual nan ta haci caba pa otro departamentonan cu ta riba nan mes, pero esaki ta un topico cu ainda no tin solucion riba mesa p’e.
Si esey ta e deseo, lo mester bin un cambio di ley e ora segun Gomez-Pieters. Den otro departamentonan manera DIMAS, of DIP pa cu erfpacht, e ta regla den ley cu asina e cobransa ta fiha, e ontvanger di impuesto tin e derecho pa cobra. P’esey lo por actua riba e tereno ey pasobra si e ley no ta duna DIMP e autorisacion, dificilmente e departamento lo por cobra algo pasobra no tin autoridad riba e tereno pa haci esey.
“Mi ta compronde e dolor. Nos lo por duna sigur kico ta e experiencia. Pasobra nos ta wak cu por ta nos ta laga e trabao di nos mustra hopi facil.” E director ta bisa cu e tema di cobransa, por puntra cualkier hende den e tereno aki cu por bisa bo esey, e ta e cos di mas dificil cu tin. “Brinda e servicio, saca bo factura, anto wak con bo ta bay cobr’e awor. Mi sa cu e ta un dolor.”
