Digicel, e compania di comunicacion cu su oficina principal situa na Jamaica, a ofrece su mercadonan den Ocean Pacifico como “borg” na su creditornan, den un esfuerso pa restructura tur su debenan. Siman pasa nan a emiti un peticion special “Chapter 15” na US Securities and Exchange Commission na New York. “Esaki no ta nifica cu ta pidi pa bay bancarota, sino mas bien e ta un peticion pa Corte Mericano brinda siguridad cu e compania ta pidi pa por restructura su debenan”, asina un fuente yega na Digicel Aruba a sigura na nos awe.
Di acuerdo cu e codigo di bancarota na Merca, na momento cu solicita capitulo 15, ta nifica cu un representante di compania cu ta basa pafo di Merca, ta pidi pa haci uzo di e hurisdiccion Mericano pa por conta cu cooperacion di Corte Mericano den un caso di insolvencia. Den e caso aki, ta purba pa por maneha e caso huridico entre Corte Mericano y Corte di otro pais.
E negoshinan di Digicel den Ocean Pacifico ta representa un garantia di no menos di $941 miyon na bonds cu ta vence na aña 2024, pues aki 4 aña mas. Ta bon pa bisa cu Digicel ta e proveedor di comunicacion mobil mas grandi den e region di e islanan Pacifico. E compania Digicel Pacific ta conta cu 2.5 miyon cliente di celular entre e islanan Papua New Guinea, Fiji, Vanuatu, Samoa y Nauru. Bale la pena menciona cu nan ta maneha 65% di e mercado na Papua New Guinea.
E fundado di Digicel, esta e Irlandes Denis O’Brien a logra obtene un aprobacion di no menos di 75% di tur e creditornan pa e por restructura e compania, dor di consolida su debe di $7 biyon den un tempo un poco mas largo di pago. Esey ta precisamente locual el a solicita na SEC na New York dia 14 di mei ultimo. E negosacionnan cu e creditorna a start na inicio di e aña aki caba. Un compania nobo awo lo emiti e bondsnan.
Si Corte di Bermuda aproba e peticion dia 8 di juni proximo, lo nifica cu automaticamente e acuerdo pa uza Digicel Pacific como garantia pa e debe di Digicel Group completo, lo drenta na vigor un siman despues, esta dia 15 di juni 2020.
Aña pasa Digicel como grupo tabatin un entrada di no menos cu $2.3 biyon. Pero, e aña aki, mescos cu hopi otro compania di comunicacion mundialmente, ta conociendo un caida grandi den entrada dor di yamadanan di celular. Hopi hende ta optando pa uza data y consecuentemente ta haci yamada via “whatsapp” por ehempel, haciendo cu ta uza infrastructura di wifi pa comunica, sin cu e compania di celular mes ta haya entrada directo di dicho yamada.
Pa Aruba esaki no ta traduci su mes den ningun cambio drastico, otro cu di berdad e compania completo, di ariba te abou, ta pasando dor di un restructuracion y ta revisando tur gasto y purba haci e operacionnan mas eficiente posibel. Ta un ehercisio cu Digicel como compania ta haci cada pasa tanto aña pero awo ta un poco mas stringente debi na e retonan dor di e recesion economico cu mundo henter ta enfrentando.
