Diasabra ultimo, den un comunicado special, e comunidad Chines a expresa nan malcontento riba 24ora.com pa un articulo cu Matutino Diario a publica contra e Chinesnan, relaciona cu e Coronavirus. A sinti nan mes discrimina y a considera e articulo como “bully” contra Chinesnan. Den fin di siman ainda un cliente a yama Polis for di un supermercado Chines, acusando e Chines di tin Coronavirus. Tur esaki ta bin dor di e forma di “punta dede” riba un comunidad etnico.
Den e comentarionan riba e articulo, a nota cu Chinesnan masalmente a pidi pa start un boycot y stop di bende Diario den nan supermercado of minimarket. Otronan a bisa pa stop di pone propaganda y cu lo considera esunnan cu ta haci’e toch, di ta apoya e stigma cu ta purba crea contra Chinesnan bibando y trahando pa hopi aña na Aruba.
Sinembargo, probablemente e presion comercial a subi asina tanto cu awe mainta e corant mas bendi na Aruba a pidi despensa riba su pagina principal, esta pagina 3. Ey gerencia di e corant a sigura cu e articulo no tabatin intencion pa insulta ningun Chines ni tampoco pa “bully” nan y a pidi despensa si acaso nan a tum’e asina. E corant a sigura cu nan tin un aprecio grandi pa e rol cu e comunidad Chines a hunga na Aruba, pa hopi generacion caba, aportando na nos desaroyo y crecemento economico.
Rond mundo Chinesnan ta bou di bastante presion, den cual mundo henter ta purba culpa China pa e enfermedad Coronavirus. Di nan banda nan ta defende nan mes cu ainda no ta sigur con e virus a origina y tampoco no ta sigur di unda. Cu mayoria casonan sospechoso y mortonan ta na China, no ta un realidad cu nan mes lo a pidi pe ni tampoco desea.
