Fin di siman tras di lomba tabata uno cu hopi problema familiar, persona burachi, discusionnan entre bisiñanan y persecucion cu a tene man di polis completamente yen. Na varios caminda polis a interveni pa problemanan aki no bay for di man.
Diadomingo atardi tabatin un persecucion serio relaciona cu e maltrato severo di un dama na Boroncana. E chauffeur femenino a raporta cu e persona sospecha di a maltrata e dama na Boroncana lo tabata siguiendo su auto riba caminda grandi direccion San Nicolas. E persona ta pidi asistencia di polis mirando cu e persona aki lo ta agresivo. Tampoco no tabata sigur di su intencion pa cu e persecucion tumando luga.
Despues cu el a sigui e vehiculo for di Pos Chikito te Cura Cabay a dicidi di para na haltura di Keke Mega Mart na Cura Cabay pa asina topa cu e patruya di polis cu a bin na su rescate. Segun informacion e ocupante (nan) lo tabata dirigiendo nan mes na warda di polis pa pone denuncia contra e acto violento di maltrato cu a tuma luga e anochi prome na Boroncana.
Mas despues un patruya a compaña e vehiculo te na su cas pa asina sigura cu e sospechoso no ta den cercania. Tin di menciona cu e sospechoso ainda no ta den man di autoridad. Un buskeda a tuma luga den e area pero no a logra localis’e te ainda. Nan tin su datonan y e auto cu e tabata den dje na ki adres e ta registra. Pues den un caso asina, ta miho pa e entrega su mes.
