Den un record di tempo, MetaCorp a logra inverti un suma cuantioso pa renoba e edificio original y construi un pantaya grandi atrobe, uzando no menos cu 10 container yen di material pisa, cu ta duna clientenan un bista cla di peliculanan for di unda cu nan ta sinta den The Movies @ Drive In situa na Balashi 60. Diaranson awo e ta habri oficialmente, cu un concierto cu Jeon y algun artista sorpresa.
E evento ta start pa 6:30pm y o termina pa 10:00pm. Lo cobra solamente Afl. 35 pa cada auto, sin limite di cuanto pasahero drenta den cada auto. Separa di Jeon, lo tin tambe DJ nan Steve Andreas, Big Rig, Deejay T y Dr. Eli. Tur ganashi lo bay pa Fundacion pa nos Comunidad y Fundacion pa Hende Muhe den Dificultad.
Algun siman pasa nos a entrevista Eddie de Veer, director di MetaCorp, cu a sigura cu e inversion aki ta mara na e compromiso serio cu e compania netamente Arubiano tin cu nos pais. E ta convenci cu den momentonan di crisis, manera cu nos ta aden actualmente, ta necesario pa nos mesun hendenan demostra nan compromiso y confiansa den nos economia. Cu e inversion grandi aki, a crea cupo di trabou, no solamente den e fase di renobacion y construccion, sino tambe pa despues awor cu e negoshi ta habri y lo ta operacional diariamente.
E intencion ta, segun de Veer, pa purba crea e mesun ambiente cu tabatin prome cu Drive In a cera na aña 2009. Lo haci uzo di un canal di radio riba FM pa transmiti zonido di e peliculanan. Asina por ehempel a conserva e mashin cu ta conta cuanto cliente ta drenta den e area di consecion. Pa loke ta e menu, esey tambe lo purba iguala. Lamentablemente e famoso hamburger, e sabor probablemente lo no ta mesun cos, pasoba e persona cu tabata trah’e no ta na bida mas.
E. De Veer Drive-In Theater a habri na Kibaima na aña 1969 cu e prome pelicula “The guns of Navarone”. Nan a cera na aña 2009 y e utimo pelicula tabata “Fast and the Furious # 4”. E Drive-In tin espacio pa staciona 380 auto.
