Reginald “Richi” Danies ainda ta protesta riba Plasa Henny Eman, ya pa 7 dia caba y a pone borchi di Aruba Pro Pedofiel. P’e e ta mirando un tiki claridad y a kere ta su so, pero no ta asina. Tur esunnan cu ta apoya Danies, ta pidi p’e no move di eynan. E ta mira cierto movecion, cierto comportacion a lag’e sinti cu e mester keda eynan y ta dun’e mas forsa pa sigui lucha.
Parlamento ta den reces, Gobernador ta cu vakantie, pero Danies a indica cu e lo keda para eynan. El a haya invitacion di Parlamento pa reuni cu cierto Minister, pero e ta prefera di keda para na e plasa. A puntr’e su pa reuni cu Parlamento otro siman. Aworaki e no ta interesa den reunion, pero door di mira e comportacion y trato di nan, e ta prefera keda eynan.
Turistanan ta acerc’e pa puntra si tur loke e tin riba e borchi ta asina y e ta bisa nan pa google e informacion. Pa loke ta e hotel mes, nan no ta contento cu su protesta. Nan a bay puntra paden p’e kita e borchi, pero nan no por haci nada.
Segun Danies, di sinta pafo ta manera ora cay cera. Pasobra despues di 2 dia ta mira Fiscal di Ministerio Publico. El a sigui e noticia di e pareha Mansur cu a cay cera, cu awor ta bisa di ta heroe. E ta pensa cu pa ta heroe, ta ora yega cerca Fiscal. E dosnan ey a keda cera un dia y a mira un Sub Fiscal. Awo e mes ta warda pa mira kico ta bay pasa despues di 10 dia, si un porta lo habri p’e.
Tur hende cu a trece sea algo di come of di bebe, tur ta bisa cu nan no por. Tin hopi cos ta pone nan pa no sali y protesta. E ta kere cu si nan no compronde e problema aki, esey lo caba cu e generacionnan. No ta muchanan di 18 aña of menos ta drumi na e plasa, sino hende grandi di 45 aña p’ariba y ta hende muhe, el a splica. E problema di pedofiel no ta di e generacion aki so, pero e ta algo cu ta keda bay.
E ta conseha hende pa nunca tuma husticia den nan propio man. E ta un persona cu a yega di bay prizon. El a bisa cu si tuma husticia den man, e persona ta cay cera y e pedofiel mes ta keda liber. E ta corda riba e caso di un tata cera pa a mata un abusado.
Reginald “Richi” Danies a organisa un manifestacion “Ban Caya Aruba” diabierna dia 3 di juli ultimo. Durante e manifestacion aki, cu a cana pacifico, a caba cu varios detencion. A detene Danies na final pa stroba trabou di Polis y di a menasa un Polis den cuadro di ehecucion di su funcion. El a keda algun dia encarcela. Diabierna dia 17 di juli el a organisa un otro manifestacion dilanti edificio di Parlamento pero un grupo masha chikito a atende. Desde e dia ey e ta sinta riba Plasa Henny Eman, entre e edificio di Parlamento y Gabinete di Gobernador. Awe ta un siman caba cu e ta eynan, compaña pa un man yen di sostenedonan cu ta apoy’e y sosten’e den e lucha pa caba cu pedofilia y abuso general contra mucha y hende muhe.
