Diaranson hues den Corte di Prome Instancia a dicta sentencia den caso di e viuda di consul di Venezuela cual su permiso pa reunificacion familiar a wordo nenga door di Minister di Integracion, Glenbert Croes.
mr. Desiree Croes, abogado defensor di e viuda, a cuminsa na bisa cu e caso aki tabata uno excepcional y cu, a base di motibonan humanitario, DIMAS y minister mester a haci un excepcion den e caso aki, unda cu mester a permitie p’e keda.
Corte a bisa cu Corte Europeo a acepta cu entre e adultonan y nan mayornan tin un laso familiar cu mester proteha. Hasta si e adulto no ta biba cu su mayornan, cu ta un ciudadano Hulandes.
Hopi lo ta di pensamento cu e caso aki lo por habri caminda pa casonan similar of casi similar, pa cual mr. Croes a admiti cu si el a haya varios peticion caba, pero no ta pasobra cu a haya un sentencia favorabel den e caso aki, tur caso ta bay ta mesun cos. El a enfatisa cu cada caso ta diferente.
No ta asina c’un yiu tin un mayor ta biba den exterior y no tin hende pa wak p’e, cu automaticamente e lo por trec’e Aruba, cual sigur no ta e caso. Un biaha mas, e caso aki tabata uno excepcional. Ta cuater aña largo nan a bringa e caso pa por a logra trece e mama Aruba, cual nan a logra.
E señora aki di 82 aña a biba na Aruba den e periodo di aña 1993 te cu aña 1995 y di aña 2001 pa aña 2003. Esey tabata tempo cu su casa tabata cu e consul di Venezuela na Aruba. E esposo a fayece na aña 2018. E aña ey el a drenta Aruba como turista na december y dia 2 di juli di aña 2019, su yiu homber a haci un peticion pa permiso di estadia temporal. Pero no a haya un decision y a entrega un obhecion pa un falta di decision. Es decir, cu ta for di aña 2018 caba, e caso aki ta tumando luga.
Kisas si e minister a wak e caso aki, mas den bista humanitario, e caso lo no a dura asina tanto. Minister tin su trabou pa haci y si e ta sinti cu tin precedencia, e lo mester para e caso. Pero, esaki tabata un caso berdaderamente excepcional y si a tuma un decision contrario na loke a tuma, e lo tabata inhumano.
Den su sentencia, hues a indica cu e Minister no a splica suficiente y no a motiva pakico a rechasa e admision di e señora si ta debi na interes general of orden publico. No ta kere tampoco cu esaki lo crea un precedente, a base di situacion similar. Pues corte ta bisa cu e minister no tabatin suficiente motibo pa rechasa su peticion a base di e motibonan humanitario pa biba aki cu su yiu.
Europees Hof voor de Rechten van de Mens (EHRM) tambe ta bisa cu mester tin un relacion di dependencia entre di un yiu mayor di edad y su mayor. E ora por papia di un circulo familiar, cual lo por duna derecho di proteccion di famia. Den e caso aki, e señora en cuestion ta cay bou di articulo 8 di EHRM, unda cu mester proteccion como parti di e famia di su yiu. Segun e articulo aki tur ciudadano tin derecho pa su bida priva, su famia y bida familiar. No por dicidi pa un famia con ta hiba nan bida familiar, a menos cu e ta necesario pa siguridad nacional, orden publico, of bienestar economico di e pais.
APELACION
Por ultimo, mr. Desiree Croes a bisa cu Gobierno tin chens ainda di apela. Pero toch nan ta spera cu esey no sosode. Y si acaso Gobierno tuma e decision di apela toch, nan ta prepara pa esaki y cla pa defende su cliente.
Minister no a splica suficiente y no a motiva pakico a rechasa e admision di e señora si ta debi na interes general of orden publico. No ta kere tampoco cu esaki lo crea un precedente, a base di situacion similar. Pues corte ta bisa cu e minister no tabatin suficiente motibo pa rechasa su peticion a base di e motibonan humanitario pa biba aki cu su yiu.
