For di luna di maart caba e diferente departamentonan encarga cu enseñansa na Aruba a cuminsa muda pa John F. Kennedy Education Center. E situacion di crisis sinembargo a causa un retraso den esaki. Pa e motibo aki Departamento di Enseñansa Aruba (DEA) ta informa cu su oficinanan ta sigui cera pa publico te cu proximo aviso.
Durante e temporada aki por comunica cu Departamento di Enseñansa via email. Pa informacion of preguntanan general por manda un email na [email protected]. Pa preguntanan relaciona cu Arubalening mester manda un email na [email protected] y pa preguntanan relaciona cu Landsexamen mester manda un email na [email protected]. Pa informacion relaciona cu Enseñansa na Aruba por acudi tambe na nos website www.ea.aw como tambe na nos facebook page @EducationAruba.
Departamento di Enseñansa ta spera di pronto por reanuda servicio for di su localidad nobo cu ta e John F. Kennedy Education Center situa na Stadionweg 37.
Tocante John F. Kennedy Education Center
AIB Vastgoed, un compania di AIB Bank a cumpra e ruina pa e inverti den renob’e, ampli’e y manten’e, mientras cu ta huur e bek cu Gobierno pa 5 aña. Gobierno a dicidi cu Departamento di Enseñansa lo muda pa e facilidad nobo aki. Lamentablemente John F. Kennedy School a keda 21 aña para sin uzo y bayendo atras, sin mantencion. E compania di construccion BOHAMA a haci e trabounan di renobacion y ampliacion di e facilidad.
E construccion riba su mes ta encera un suma di 15.9 miyon florin, a renoba e edificio principal y hunto cu su renobacion, a bin un edificio nobo di un total di 6335 meter cuadra di espacio di oficina.
