Segun nos constitucion cu mi ta corda: “het onderwijs is een aanhoudende zorg van de regering”. Tambe cu si bo tin tanto alumno bo por tin un scol y derecho ariba subsidio. Nos desde hopi aña a conoce: Universidad di Aruba, SKOA, SMOA, SPCOA, International School y gobierno tin su scolnan publico y di cual e ta paga su gastonan.
E situacion aki a nace historicamente tempo cu religion tabata algo sagrado den nos comunidad y esunnan cu no kier esaki gobierno a percura pa scolnan publico pa nan por a bay. Mi meta di pone mi opinion personal ariba papel ta pasobra mi tambe ta preocupa cu tantisimo intrankilidad, discusion, demotivacion pa nos muchanan etc.
SIMAR ta odia MEP:
Mi ta cuminsa bisa cu mayoria di nos – cu a haci bon uso di e educacion cu nos a haya – a cubri den tur sector funcionnan hopi importante danki na nos preparacion. Pa esaki nos ta hopi agradecido na nos mayornan, e educacion na scol y e educacion di e ambiente nos mes ta scoge cu nos ta anda aden den bario y ariba caya. Nunca cu ami a guia un gobierno mi a mete politicamente cu nos enseñansa. Discusionnan cu por tabatin ta lo material, placa y mas placa y no contenido di enseñansa. Cu sindicato SIMAR ta odia MEP segun mi hasta ta historicamente, pasobra contra nos gobiernonan so nan ta protesta pa tur cos y hasta welga pa mas y mas kiniki, pero nos a custuma cu esaki caba y e cos aki a para bira a way of life di SIMAR pa cu MEP!
Principio di “no work no pay”:
Mi a caba di lesa cu e aña escolar nobo lo ta 2 dia pa siman so lo tin les pa nos muchanan na scol. Segun mi e cos aki no por ta bon. Cu e muchanan tabata bay 5 dia pa siman mes e resultadonan den e ultimo añanan pa diferente motibo tabata laga masha hopi di desea. Mucho mucha ta cay afor y ta keda sin tin ni un pida papel. Cu duele na mi curason mi a lesa cu ni 25% di nos muchanan tin ni sikiera un MAVO-diploma. E motibonan ta varios. Mi a lesa tambe cu 70% di nos muchanan tin mas cu 2 luna sin por haya les, pasobra nan no ta conecta digitalmente cu scol. Bo no por culpa ningun hende ni gobierno pa esaki. Ta e bendita Corona virus tin e situacion asina pa nos tur. Awor si bo sa cu 70% no ta conecta cu scol, ta kico lo pasa cu nan e resto di 3 dianan? E parti material ta con un educador cu tin casi 70 dia di vacacion pa aña escolar ta con awor e ta bay haya 3 dia mas cu pago y di unda e principio “no work no pay” a keda?”
Miedo y preocupacion:
Segun mi e argumento di miedo ta un preocupacion pa ser afecta, pero e ta conta pa tur hende cu tin cu traha muy en particular dokternan, verpleegsternan, polisnan etc. Ta con lo cuminsa cu nan tambe si nan tambe kier traha 2 dia pa siman so? Mi tin comprension pa tur hende cu ta cuida curpa pa no ser contagia, pero no tin ningun gobierno cu por duna bo e garantia aki. Ta abo mes mester tuma tur medida pa yuda bo mes. Ta abo ta cuida bo mes. Garantia pa bida no tin, pero pa holoshi si pa un paar di luna! Mi ta papiando cu hopi hende cu ta preocupa pa futuro di nan yiunan y aki irespecto nan color politico. Nos tin e obligacion pa ban bati cabes hunto con si por sigui duna nos muchanan locual nan tin derecho ariba dje cu ta un bon educacion. Un pais sin materia prima cu solamente posibilidad den turismo mester keda cuida su educacion cu ta e unico tool mas grandi pa bo por tin un futuro como mucha.
Basta pleita pa mas kiniki:
Ami a lanta den un ambiente, unda lo material no tabata t’ey manera mester ta, pero door di educacion, sacrificio propio mi a yega na cubri varios funcion den comunidad. Esaki mi ta desea tur nos muchanan, pa no kita a base di discusion continuo, stroba y demotiva nos muchanan pa por haya un bon educacion. Un preocupacion di curason pa contribui na conscientisacion di nos pueblo. Educacion hunto cu turismo ta lo unico cu ainda nos a keda cu ne pa sali afor y un dia lo por sigui progresa. Un bon siman y basta pleita pa mas “kiniki” y lubida di siña nos muchanan: aap, roos, zeep, schoen. etc. Man na obra pa nos tur. Nos no mag kita e oportunidad constitucional cu nos muchanan tin derecho ariba dje cu ta un educacion adecuado. No stroba mi como mucha ni kita e oportunidad pa mi tambe busca moda di educa mi mes pa mañan ami tambe por subi e trapi di progreso den bida.
