Diamars mainta un delegacion di studiantenan di Aruba a biaha bay New York pa atende e NHSMUN – National High School Model United Nations Conference. Nan tin 9 luna ta prepara unda ta haya un bista di e competencia prome cu nan bay eynan y presencia esaki pa nan mes.
Maria Teresa Rodriguez, studiante na Aruba y delegado general ta conta cu nan a prepara hopi duro cu esaki via sesion online hasta desde januari. Nan a repasa e reglanan, debatenan y discurso cual ta tur loke nan lo bay topa cu ne aya na New York e siman aki pa competi na NHSMUN.
E conferencia ta encera un competencia na unda studiantenan rond mundo ta bini hunto – ocho mil studiante mas o menos – dividi den dos encuentro. Nan lo ta presente den e prome sesion y representa un pais cu nan ta haya for di e organisacion como tarea, den e caso aki e grupo di Aruba lo representa Iraq y Croatia. Nan lo representa nan den diferente aspecto.
Maria Teresa mes lo bay UNICEF. Nan tin algun comision di Paz y comision di Derecho di Animal y basicamente bo ta representa e pais pa asina por bini cu un tipo di solucion p’e paisnan aki, bao ‘modelo di nacionnan uni.’ Dus bo no ta realmente resolve e problema pero ta pretende di haci esaki mientras ta tuma posicion di un pais por medio di debati, discurso, y traha cu diferente hende cu hopi diplomacia.
“Mi ta gusta e experiencia. Mi ta anticipa cu e lo tin su retonan pero mi ta prepara p’e,” Paulina Perret, un di e participantenan ta conta. E grupo ta sinti hopi honra di por a inspira otro scolnan tambe pa start un delegacion propio. E aña aki tin otro scol ta bayendo despues cu e aña anterior nan tabata e prome delegacion di Aruba pa atende esaki. “Nos ta sinti orguyoso di por inspira otro pa tuma e paso aki pasobra ta algo cu bo lo corda pa resto di bo bida.”
NHSMUN ta tuma luga diabierna 8 di maart te cu dialuna 11 di maart pa loke ta e prome encuentro, y despues riba 13 di maart te cu 16 di maart ta e siguiente ronda. E aña aki nan ta celebrando 50 aña aniversario, estableci na 1975 caminda studiantenan tin e oportunidad pa atende reunionnan cu representantenan diplomatico di e paisnan cu nan ta representa y otro bishitanan di lidernan di NGO y Nacionnan Uni.
