Aruba no a pasa e evaluacion realisa aña pasa door di autoridad internacional di aviacion. A haya seis luna pa drecha e situacion y aworaki falta solamente dos luna.
ICAO ta International Civil Aviation Organization. Nan ta e organo cu ta controla mundo di aviacion y loke ta rond di dje. Asina por ehempel ta exigi cu mester tin un sede di bombero cerca di airport y cual ta e ekiponan cu nan mester tin, ademas di manualnan di procedura.
Minister di Husticia Rocco Tjon dialuna mainta den un conferencia di prensa a reconoce cu Aruba no a pasa e evaluacion debi na entre otro algun deficiencia na Cuerpo di Bombero. E delegacion a haci algun sugerencia pa Aruba cumpli cu nan.
Inmediatamente despues di a ricibi e noticia, a bay den dialogo pa mira con ta bay atende cu e situacion aki. Pa mira con por bay cumpli cu e condicionnan menciona, a instala un stuurgroep cu ta consisti di representantenan di aeropuerto, Ministerio di Husticia. Ministerio di Turismo y Cuerpo di Bombero.
A base di e cooperacion y consulta di husticia entre e cuater paisnan di Reino tin un plataforma crea for di cual Hulanda ta brinda ayudo necesario na e islanan Hulandes den Caribe. Di esaki tambe lo bay haci uzo.
Tambe ta den combersacion cu Schiphol pa manda un persona den forma di ayudo tecnico pa implementa e diferente recomendacionnan.
“Nos tin e plan y e fondonan pa ehecuta y ta trahando pa logra finalisa cu e recomendacionnan den seis luna di tempo,” e mandatario a sigura.
EKIPO
Tambe a puntra minister Rocco Tjon riba dos crashtruck cumpra door di e gobierno anterior pa cual a paga un suma basta grandi pero cu no ta den uzo. Ta papia di un suma di 200 mil florin y awo ta resulta cu no por haci uzo di nan.
Minister Tjon a simplemente bisa cu esey tabata un decision di tempo di e gobernacion anterior mientras cu e mes a scoge pa cumpra trucknan completamente nobo. Di cual algun a haya caba y ta den funcion. Un ekipo nobo cu ta bay haya pa prome biaha ta e ladderwagen, cu ta hinca den presupuesto 2024.
Pero tambe a haya na un acuerdo di servicio pa mantencion di e ekiponan aki cu diferente compania local. Di e forma aki ta garantisa mantencion di e trucknan den un forma constante. Un acuerdo asina ta permiti cu un ekipo cu daña ta bira operacional mas lihe posibel.
Pa loke ta destino di e crashtrucknan no sa ainda kico lo bay pasa. Awo Brandweer ta haciendo un inventario di e materialnan cu tin, pa dicidi kico por drecha, kico por wordo uza door di un otro servicio manera Bureau Rampenbestrijding cu tin interes den algun di e vehiculonan cu por wordo drecha.
