Minister Andin Bikker a invita sindicato Sinba pa un reunion cu caracter di urgencia na Bestuurskantoor, relaciona cu un problema pa hopi tempo caba di promocionnan pega, ekipo y materialnan cu nan tin mester y no ta yega na un solucion.
Fuera di esey, aparentemente lo mester a pone e comandante Edward de Cuba riba un non-actief, manera cu 24ora.com a publica un rato pasa riba nos portal.
Presidente di sindicato Sinba, Davni Roza, a splica na salida di e reunion aki cu nan ta contento. A realisa loke miembronan a pidi pe.
E bezetting na aeropuerto a bay bek na 9 y ta gradici miembronan pa nan persverancia. E siguridad ta bek na su luga manera mester ta, pasobra Brandweer ta duna siguridad na Aruba, con cu mir’e.
Aruba ta depende riba siguridad y no por baha cantidad di bomberonan riba e shift ey na aeropuerto te na cuater y ta manda e resto den dia. Esey ta un abuso di marca mayor. Por fin despues di basta tempo cosnan ta cuminsa cana, segun Roza. “E wiel a cuminsa lora”, e ta agrega.
Miembronan a firma na 2011, 2012, 2013 y na 2020, cu tin un mal maneho. Awo cu esey a costa un cabes, ta lamenta esey pasobra e sindicato no a pidi pa esey.
Roza a menciona algun ehempel, manera e post na aeropuerto y e post na San Nicolas, cu ta den un situacion basta deplorabel.
Trahadonan ta pidi pa yudansa y ta grita pa un solucion. Ta bon a acerca gobierno pa e tipo di cosnan aki.
Promocionnan pega
A papia cu e minister riba promocionnan pega. Segun Roza, den un eleccion cu tabata tin di sindicato aña pasa, a bin investigacion loke tabata tin pendiente den Cuerpo. Tabata tin 19 promocion cu mester a adresa. Di 2014 e ultimo carta cu a sali no a sali nada mas. No ta husto, siendo cu tabata tin dos persona cu nan promocion si a keda cla anto bao di mesa. No tin palabra pa bisa, pero no tin hende contento den Cuerpo di Bombero.
Awor aki ta bezig ta reglando e asunto aki y gobierno lo atende esaki sigur pa trece un soluciona.
E lista ta largo
E lista cu nan tin ta masha largo mes di loke nan falta y esey tambe a discuti cu e minister. A menciona por ehempel e coolernan cu ta daña, pero door di e insistencia di e sindicato, a drecha esakinan. Pero no ta descarta e demas defectonan cu tin na e otro postnan, manera e wayanan na aeropuerto y e edificio na post San Nicolas.
A papia cu ta sindicato ta instiga parlamento y/of gobierno, pero trahadonan a demostra cu no ta asina. Por wak na Tanki Flip, no tin nada cu e trahadonan por traha sigur.
Por fin un normalidad
Por bisa si cu awe nochi e bezetting na aeropuerto ta bay bek na nuebe, manera cu mester ta. Pasobra antes e tabata 4 empleado na luga di e cantidad ya menciona.
“Por puntra cualkier bombero con nan tabata traha. Sindicato a bay cu prueba parlamento pa asina mustra nan di nan dilema. Y tin cu agrega, Brandweer no ta bon,” Roza a enfatisa.