Lider di partido Movementu21, Daisy Coffie a deposita su voto den ora di atardi na Jong Bonaire y no a tarda mucho cu prensa local y tambe di Aruba, incluyendo nos reportero di 24ora.com, a acerc’e pa haya su prome comentarionan.
Den un caravana cu bandera ros y blanco, a escolta lider di e partido den un rolstoel, debi na un lesion na su pia, p’asina deposita su voto.
El a comenta cu e dia a bay trankilo y a indica cu su crew a haci un trabao tremendo fo’i trempan.
Pa loke t’e campaña, esey a bay hopi bon. Nan tabatin dos aña preparando p’e dia di eleccion. A cuminsa cu nan campaña fo’i fin di november y tiki tiki escalando pa por a yega riba e fecha di 15 di maart.
A pasa tur bario, cual nan tin ta bishitando fo’i aña pasa. A inventarisa tur e dolornan cu ta biba den e barionan pa por a tene cuenta cu e dolornan aki den nan programa di M21 tambe.
Tin un participacion enorme di pueblo den nan programa di M21. Esun cu lesa e programa aki lo reconoce nan bario y su input den e programa di e partido.
Den e caso cu nan por forma un gobierno, segun Coffie, den e programa di M21 a pone caba hopi cla den e prologo cu e programa ey ta nan documento pa negosha cualkier gobierno, si esey bin na mesa.
Si tin un partido di preferencia, Coffie a indica cu n’e momentonan aki ta bringando pa cinco asiento. E ta kere cu tur partido merece un turno na mesa dado caso cu mester negosha. M21 ta habri pa sinta na mesa si esey ta necesario cu tur partido y despues di sinta cu tur partido na mesa, evalua ta cua t’e partido cu lo cumbini M21 pa por traha cu ne pa por realisa lo maximo posibel p’e pueblo di Boneiro, di loke tin den e programa di M21.
