Minister President: E aña aki no tin Arubadag…Ta spera cu 2024 si

E ta e celebracion Arubiano mas grandi cu ta tuma luga tur aña na Hulanda, unda cu e artista-, grupo di baile y tentnan di cuminda ta forma hunto e evento yama Arubadag. Sinembargo pa e ultimo tres añanan tras di lomba esaki no tabata posibel. Aunke ya tur cos ta den normalidad caba, ainda gobierno ta sinti cu pa via di pandemia no por organis’e, ta pensando un concepto nobo pa Arubadag, pa cual lo tuma un “break” e aña aki.

Tin cu remarca si cu tabatin varios cuestionamento di parti oposicion riba e ultimo evento di Arubadag, caminda cu ex-Minister Plenipotenciario, Guillfred Besaril lo a cera un deal lucrativo c’un amigo di dje, segun oposicion. E no ta un secreto cu cos a bay completamente robes den Arubahuis durante e periodo di Guillfred Besaril.

Regularmente e funcionarionan tabata haya telefon nobo y por a cumpra e modelo anterior pa 25 euro, e minister plenipotenciario a cumpra cama di baby cu plac’i pueblo, biahe VIP pa henter famia, huurment’i cas sin un destaho, trip pa Aruba cu hotel, auto y compras na supermercado paga, pues cos no a bay bon, pa cual awe husticia ta investigando e ex-minister plenipotenciario en cuestion.

Segun gobierno:

Manera cu por a tuma nota den fin di siman, ya na Aruba a cuminsa cu diferente celebracion den conexion cu celebracion di Dia di Himno y Bandera, 18 di maart. Pa hopi aña e fecha aki tambe ta wordo celebra na Hulanda a traves di e festival Arubadag.

Sinembargo ya pa tres aña no tabatin e celebracion aki. E aña aki tampoco. E motibo tabata e pandemia cu a causa di no por a organisa nada cu un multitud di hende. Awor cu tur cos ta bayendo pa normalidad bek ta bon momento pa reevalua e concepto di Arubahuis.

Bou guia di Minister President a institui un comision y a delibera cu hopi sector den comunidad y cu e studiantenan na Hulanda. E conclusion general ta cu ta momento pa e celebracion di Arubadag ofrece algo mas cu solamente un celebracion cultural. 

E concepto nobo ta mas bien un exposicion di kico tur Aruba tin pa ofrece riba tereno di labor, turismo, economia, enseñansa y ta finalisa cu un celebracion cultural.

Considerando cu e cambionan aki ta tuma nan tempo pa wordo bon hinca den otro, a tuma e decision pa no organisa e celebracion e aña aki. Lo haci uzo di e tempo pa sigui prepara tur locual ta necesario pa asina introduci e concepto nobo aki otro aña.

Pronto minister president lo presenta e propuesta final na Conseho di Minister.