E situacion cu a surgi na Merca unda cuatro miembro di famia a bira malo y fayece di coronavirus ta lamentabel sucedido cu ta ehempel pakico na e momentonan aki ta importante pa mantene distancia social, inclusive cu miembronan di bo mesun famia.
Cuater persona di e mesun famia a fayece di coronavirus den estado di New Jersey, cu tres miembro di famia mas interna den hospital.
Grace Fusco, 73, y seis yiu adulto di dje a sinti malo despues di un reunion familiar. Casi 20 otro familiar ta den cuarentena propio y sperando pa haya sa si nan ta infecta.
E cifra di morto na Merca ta sigui subi pa cual expertonan ta adverti contra reunionnan social.
Tristesa grandi
E cuatro miembronan di famia cu a fayece ta Grace Fusco y su yiunan Rita Fusco-Jackson, Carmine Fusco y Vincent Fusco.
Rita Fusco-Jackson, un docente di 55 aa a fayece diabierna. E no tabatin ningun otro problema di salud, segun autoridadnan. E tabata di dos persona pa fayece di Covid-19 den e estado y e prome morto tambe a atende un reunion di famia Fusco recientemente.
Carmine Fusco a fayece diaranson, sigui oranan despues pa su mama Grace Fusco.
Di acuerdo cu New York Times, Grace Fusco a fayece sin ta na altura cu su dos yiunan a perde e lucha contra malesa respiratorio mortal cu ta azotando planeta mundo. Diahuebs Vincent Fusco a fayece den e mesun hospital unda su mama tabata.
Segun e miembro di famia Paradiso Fodera, 19 miembro di famia a atende e mesun cena y awo a pone nan mes den cuarentena, y ta sperando un siman pa haya resultado di nan test di virus.
E ta cuestiona pakico e miembronan di famia cu no ta hospitalisa tin resultado di test. El a puntra di con atleta y celebridadnan sin sintoma ta haya prioridad riba un famia cu a wordo ataca pa e virus.
ARUBA
Aki na Aruba tin preocupacion pa e tipo di contagio ey. E caso aki ta ehempel di e preocupacion pasobra e ciudadanonan no kier sa kende e hendenan ta, pero con e contagio a tuma luga, den seno familiar of door di contacto di trabou, segun un ciudadano a comenta na 24ora.com
