Diadomingo anochi 9’or a cuminsa e di dos dia di toque de queda (tdq) y ora cu a spera cu e situacion lo bira mas trankil, algo a bay robes y e cantidad di detencionnan a yega te na 45.
Manera 24ora.com a relata despues cu e TDQ a drenta na vigor ayera nochi, Polisnan tabata core ariba bou pa e diferente hechonan cu a keda registra, entre otro robo, pelea, y hendenan riba caya. Den e prome dos oranan di e orario di TDQ tabatin asistencia na: Banda di Wit Gele Kruis na Playa; na De vuyst; Wayaca; Paradera; Johan de Witstraat; Centro Kibrahacha; Mandolinstraat, Dakota; St.Cruz; Sero Patrishi; Lucianitastraat Playa Pabou; Pacifico Dakota; Royal Plaza Playa; Rondweg Dakota; St Cruz Huchada; Timbalstraat (Dakota); Flores Supermarket Sero Patrishi; Giselle Noord; Sabana Basora y mas.
Cuanto di e cantidad di hendenan aki a wordo haya literalmente ta keiro riba caya no ta menciona, pasobra tabatin un of mas incidente cu a sosode na cas di famia mes, pues den nan cura di cas. E famia aki, cu ta cuatro cu a keda deteni, a haya en total 4000 florin di boet. Otro informe cu tin, pero cu prensa no por a confirma pa su mes pasobra no ta permiti pa ta riba caya ora e hecho a tuma luga y saca potret e momento ey, ta cu tres persona a caba di sali di hospital y bayendo cas a keda deteni. Nan tambe a haya un boet. Si calcula, a base di e datonan duna e dia prome, cu 40 persona mes a haya un boet di 1000 florin ta nifica 40 mil. Den dos dia caha di Gobierno ta bay haya 70 mil florin extra. Si e personanan aki no paga e boet den dos siman di tempo, nan lo haya un citacion pa bay Corte, unda cu fiscal su demanda lo ta mas cu e 1000 florin duna inicialmente.
Y si e persona no paga toch, e lo bay cera pa algun dia, dependiendo di e suma cu a keda imponi. Entre esnan deteni diadomingo anochi tabata di e periodista Sharina Henriquez, kende a sali di su cas pa entrevista un turista con e ta anda cu e TDQ na Aruba, practicamente su so den un hotel casi completamente bashi y cu distanciamento social. E tambe a haya un boet di 1000 florin.
