Diferente unidad a mobilisa inmediatamente direccion Palisiaweg, San Nicolas pa un candela cu a pone tur hende riba alerta. Segun por a compronde, un cuarto/ garage caminda ta warda articulo di e cas, a cende na candela y tabata menasa e cas.
Diferente unidad tanto di brandweer como policial a yega na e sitio pa asina constata cu en berdad e candela tabata basta grandi y cu e cas principal tabata na peliger. Esaki a tuma luga den careda di 5:00pm y mesora a drenta den accion.
Afortunadamente a yega na tempo, a evita cu e cas completo lo a kima, aunke manera den tur emergencia cu candela, tin cierto daña cu lo bin cu ne entre otro di awa mes tambe pero asina mes a evita un perdida completo.
Na sitio a haya informe cu tabata trata di un frigidair cu lo a cende na candela y esaki a pone cu e cuarto na su turno tambe lo a pega candela. Ademas di polis y brandweer na e sitio, a presenta personal di Elmar pa asina kita coriente mesora pa evita cualkier desgracia cu coriente mientras ta bringa pa paga e candela.
Bon trabou di brandweer cu a traha rapido a logra scapa e cas y evita un perdida grandi pa e doño di cas.
