Diamars atardi a tuma luga un reunion importante pa nos pais. Ta relaciona cu e tema di purificacion di awa preto. E reunion a tuma luga na RWZI Bubali entre director di DOW, ing. Marlon Croes, su asistente Daryl Lue hunto cu mediado di gobierno, Anselmo Pontillius y otro band’i mesa; un delegacion di expertonan Mericano.
Nan ta na Aruba pa negocia un posibel solucion temporario p’e situacion di RWZI, caminda cu e holo stinki ta penetra tur dia den camber y restaurantnan cerca di Amsterdam Manor. Ta haya masha straño, mirando cu ta recien ainda cu a anuncia cu lo traspasa e funcionamento di RWZI for di mannan di DOW pa Utillities Aruba. Pues for di Ministerio di Infrastructura, mr. Evelyn Wever-Croes pa Minister di Energia, Glenbert Croes. Di Utillities Aruba no a mira ningun representante ni mucho menos e director.
Na final di e reunion a topa cu Mediado di Gobierno, Anselmo Pontillius, e tabata den auto hunto cu e expertonan Mericano. El a conta cu e delegacion Mericano ta uno tecnico y experto riba e tereno di purificacion di awa preto. Nan tin un plan con pa resolve e asunto aki di RWZI na Aruba, por lo menos pa un solucion temporal. Pero ta na DOW y Gobierno pa dicidi si ta cera e deal of no. E delegacion ta procedente di California, Merca. Pontillius di un forma masha habri a conta cu su rol manera semper ta pa intermedia entre e partidonan. Te ainda no tin ningun deal, pero por lo menos cos a cuminsa move.
DOW no kier papia
Despues cu e expertonan Mericano a sali den auto hunto cu mediado di gobierno, pa dun’e un lift pa cas, e director di DOW, ing. Marlon Croes tambe a bandona tereno di RWZI Bubali. Mescos cu a haci cu Pontillius, a acerca e director tambe, pero e no tabata habri pa duna ningun comentario. El a pasa stret dilanti e camara di 24ora.com den su auto cu glas scur sin bisa nada. Su asistente, e hoben, Daryl Lue tampoco kier a comenta nada. Lue ta un ehecutivo di DOW, pero ta parce cu el a haya ordo di su director pa “no papia nada.”
