Awe hues na Hulanda a tuma un decision den e caso sumario (kort geding) cu cinco persona y un compania a cuminsa contra pais Hulanda, relaciona cu e decision pa bay den lockdown. E medidanan pisa a drenta na vigor entrante dia 19 di december 2021 y ta na vigor ainda. Hues a dicidi cu e medidanan ta keda y cu gobierno tin e autoridad pa impone tipo di medidanan asina.
E demandantenan den e caso a exigi pa hues suspende e medidanan inmediatamente. A pidi pa laga e otro medidanan cu tabata vigente prome cu dia 19 di december keda na vigor, pero esunnan cu a bin despues, manera ta e lockdown, pa elimina nan mesora. Pero hues a bari e demanda completamente fo’i mesa awe mainta na Hulanda.
Gobierno di Hulanda tin un libertad amplio pa tuma decision cu nan ta haya necesario pa bienestar general, particularmente ora ta trata di medidanan preventivo riba tereno di salud publico. Pesey e hues mester a husga di forma modera. Ta solamente, den caso cu por prueba cu Gobierno ta tuma decisionnan robes, ta duna espacio pa cay aden. Pero di otro banda, Gobierno ta haya conseho regularmente for di expertonan den e OMT, cu ta para pa Outbreak Management Team. Hues a tene na consideracion cu como ta e OMT a conseha pa bay den un lockdown, cu Gobierno di Hulanda a actua corecto y a sigui tras di expertonan cu ta analisa cifranan veridico y ta mitiga risico pa henter e nacion.
E demandantenan a purba convence e magistrado cu e variante Omicron ta mas leve cu otronan y cu e no ta haci pashentnan mes malo compara cu e variante Delta di Coronavirus. E demandantenan a yega na otro conclusionnan, compara cu locual e OMT a analisa di e investigacionnan cientifico haci rond di Coronavirus. E vision di OMT cu ainda tin poco siguransa riba e caracteristicanan pa e variante Omicron pa por suavisa e medidanan, como tal a haya rason den Corte awe na Hulanda.
