Diabierna hues a trata un caso caminda un grupo di hoben a comete riba nos isla cinco atraco. Un di e hobennan ta menor di edad (menos di 16) na momento cu a comete un serie di cinco atraco den pleno pandemia na februari 2020.
Dia 2 di october ultimo, hues a trata e caso ampliamente, unda cu a trata e caso di e hoben menor cu porta cera. Pero e otro cuater hobennan cu ta riba 18 aña, tabata trata porta habri.
Diabierna corte a dicta sentencia den e caso aki. Tin di bisa cu e sentencia a cay tabata hopi menos di loke fiscal mes a pidi.
Tin Justin Besselink di 18 aña, pa cual fiscal a pidi e castigo mas halto pidi, esta 12 aña. Pero hues a bah’e na 48 luna, di cual 8 luna ta condiciona.
Ta haya dos aña di prueba, pero mirando su edad hoben, e mester bay pone su mes bao guia di Reclassering.
Tin Ferdinand Tejada, kende tambe tin 18 aña, pa kende a pidi 9 aña di castigo. Hues a dicidi pa dun’e 42 luna, di cual 6 luna ta condicional.
Pa Ramicel Medina Mendez di 19 aña, fiscal a pidi un castigo di tres aña y 4 luna. El a haya 2 luna di castigo, di cual 6 luna ta condicional, loke ta nifica cu ta 18 luna e mester sinta, cu dos aña di prueba.
Jureini Rosario, di 25 aña, hues a considera cu e tabata esun di mas edad, pero toch a bisa cu a pesar di esey, ta cay como un hoben. A pidi 11 aña p’e, pero el a haya 6 aña.
Justin Besselink a keda proba di cinco caso di robo cu violencia, unda cu el a viola ley di arma di candela.
A culpa Tejada di 23 caso di robo cu violencia (atraco), uno ta complicidad y participacion di robo.
Medina Mendez, a haya dos biaha culpabel den robo cu violencia.
E ultimo cu a haya 6 aña, Rosario, a haya 4 biaha robo cu violencia y tambe violacion di robo cu arma di candela.
Hues a bisa den su splicacion cu e hobennan aki a comete un serie di atraco, a shock comunidad, trece insiguridad, trece miedo. Pero di un otro banda ta tene cuenta cu nan edad hoben. Punto principal pakico el a duna un castigo menor di loke fiscal a pidi tabata nan edad hoben y e demanda di fiscal no ta brinda oportunidad pa e hobennan aki haya un oportunidad di drecha nan bida den sentido cu nan ta bay bao guia di Reclassering. Pe motibo aki mes a duna e castigo aki cu ta duna un tempo di prueba condicional cu ta permiti nan por bay bao guia.
Pa cobertura mas amplio lesa edicion di TREMPAN mañan.
