Recientemente hues a tuma un decision relaciona cu un caso cu curator, abogado mr. Jean de Cuba, miho conoci como “Jeannot”, a entama den corte na Aruba. Por corda cu e curator ta encarga cu administra, bende y reparti e herencia di La Linda pero despues tambe di defunto Haim Hochman.
E ta un storia largo di pelea familiar di e yiunan di Anna Hochman, doño di e imperio La Linda. E cuater yiunan cu a keda atras a start un pelea cu despues di hopi aña, ainda no tin fin di caba di parti e herencia di como 80 miyon florin cu a keda atras. Ta parce awor cu, despues di morto di mayoria yiu di Anna, cu awo e nietonan a opta pa sigui cu e guera aki.
E procedura aki a cuminsa na comienso di aña na momento cu curator Jeannot de Cuba a haci un peticion na corte pa declara e compania Shanlin Ventures Inc. den bancarota. Shanlin Ventures no ta un compania registra na Aruba, sinembargo, e ta haci tur tipo di negoshi aki. Inicialmente e tabata registra na St. Kitts & Nevis pero ultimo por a compronde cu a saca e nomber for di e registro eynan tambe.
Pakico De Cuba kier declar’e bancarota aki na Aruba, ta pasobra cu mientras e ta inscribi formalmente na St. Kitts & Nevis pa simplemente uza un adres unda e corespondencianan ta bay, pero ta aki na Aruba e ta opera diferente negoshi bao di e nomber aki, cu ta forma parti di e herencia di Haim Rudolf Hochman. E ultimo aki tabata maneha e imperio di La Linda pa su mama defunto. E testament di e mama tabata bisa cu e mester a administra y bende tur e propiedadnan y parti cu su rumannan, pero el a opta pa no haci esey. Al contrario, a purba sconde tur e propiedad y placa via diferente construccion di negoshinan “offshore” of a habri cuentanan di banco tur rond di mundo.
Asina por menciona cu, por ehempel, nunca Shanlin a haci negoshi pafo di Aruba. Tur tabata riba e isla. Aki e tin diferente edificio y accionnan den diferente compania. E adres di corespondencia ta den Caya Betico Croes, esta adres unda e oficina di Haim Rudolf Hochman tabata y for di e adres aki e tabata haya hopi corespondencia y tambe administratie di Shanlin. Localmente e tabata paga belasting inclusive e tin un persoonsnummer di Aruba. E tabata paga grondbelasting, pa cual e curator ta bisa cu corte na Aruba debidamente por tuma un decision den e caso aki cu ta pidi pa su bancarota.
Mientras cu e mester paga impuesto na Aruba, por a constata cu ultimamente e no ta cumpli cu su debernan fiscal ni financiero. Por tin hopi cuenta cu ta habri pa cual ta necesario pa pidi su bancarota pa por sigui mira kico ta bay resulta na final di e caso. Ademas a resulta cu Shanlin no tin un persona na timon mas. Por bisa cu e ta stuurloos y ta inactivo. E preocupacion di mas grandi ta cu el a stop di paga su debenan. Cu curator De Cuba ta haya cu ta suficiente motibo pa corte tuma un decision.
