Den fin di siman tabatin e sesionnan di anochi informativo tocante malesa di coral cu ta menasa nos awa teritorial y nos ecosistema marino. Directie Natuur en Milieu (DNM) hunto cu Fundacion Parke Nacional Aruba (FPNA) a presenta dos anochi, un na MFA Paradera y e otro na MFA Savaneta. Tur dos anochi a conta cu un grupo grandi di interesado presente pa e topico aki.
Despues di e anochi aki, a presenta tambe e oportunidad pa sigui cu workshop mas intensivo. E prome tabata riba diadomingo mainta na MFA Paradera. Ta invita interesadonan pa e ultimo sesion di awe, pa asina forma aliansa cu diversnan pa monitor e areanan cu tin potencial cu e malesa ta presente.
Awe nochi lo tin un anochi di workshop na Universidad di Aruba di 6:30’or pa 8’ or di anochi. Ta desea di conecta cu e participantenan y asina haci esfuerso hunto pa logra mas. Ta haci un yamada na tur negoshi di dive, tour operator, grupo di snorkel of cu ta eherce actividadnan di/ of riba/ bou lama pa asisti pa nos yega na solucionnan pa contene e posibel yegada di e malesa.
Cu e asistencia di sabuyadonan y ampliando nan conocemento di e malesanan di coral, ta yuda monitor e estado di e coralnan rond di Aruba, specialmente den e area cu ta bishita pa grupo di sambuyado bishitante y local.
Adicionalmente, cu e informacion colecta durante e termino di monitor, e grupo aki ta yuda traha e mapa cu posibel localidad di presencia di e malesa. Cu e mapa aki lo por determina kico lo mester haci pa investigacion cientifico y conservacion di e areanan marino.
Awe ta e ultimo oportunidad pa asisti na e workshop. Pa cu e workshop aki, ta pidi pa registra asina nos ta miho ekipa pa duna e
workshop. Manda un email na [email protected]
