Awe, dia 2 di Juli, pueblo di Corsou ta celebrando Dia di Bandera. Varios di e parlamentario y minister di Aruba, tambe a haci acto di presencia, pa asina celebra e hecho aki cu su coleganan di Corsou, mescos cu e mandatarionan ta haci, ora cu Aruba tin su Himno y bandera, como otro actividadnan protocolario entre e islanan.
Despues di a saluda su mahestadnan Rey Willem-Alexander y Reina Maxima, e parlamentario y mandataronan y demas invitadonan, a cana bay pasa e brug y finalmente Plaza Brion, pa e acto protocolar y formal di e festividad aki. Den e plenchi di forti, e bandera di Corsou a wordo prepara pa despues, escolta pa miembronan scout, nan a sali bay pasa riba brug pa despues wordo hisa. Mientras tanto, por a riba e brug marcha di e gruponan uniforma, cu ta forma parti di un grupo hopi grandi. Entre otro CurMil, Cuerpo di Douane, Cuerpo Policial, e diferente gruponan Scout. Despues por ultimo ta haya e peloton y e cheerleadernan cu ta compaña e bandera pasando riba e Ponton. Tras di e bandera ta haya un grupo di ciudadano kendenan, na un manera patriotico, ta compaña e bandera. Un marcha riba su mes. Esaki ta di 34 aña cu Corsou ta celebra su Dia di Himno y Bandera.
Despues di varios discurso, di entre otro Obispo di Willemstad, msgr. Luis Seco, miembronan di e comunidad Islam Imam Adnan, como tambe di comunidad Hindu y tambe representante di conseho di iglesia, Reverendo Leander Warren, a sigui e hisamento di bandera. Un acto solemn cu e publico a sa di presencia den tur silencio. Finalmente despues di discurso di prome minister di Corsou y tambe condecoracion di ciudadanonan cu a destaca, e ceremonia protocolar a yega na su fin.
Bishita na Tulapier y Damen Shiprepair
Como parti di su bishita di dos dia na Corsou, pareha real a haci algun bishita di gran importancia pa nos isla ruman. Un di nan ta e Megapier nobo, unda cu a devela e nomber oficial lo ta Tula. Esaki ta e lider di e revuelta di esclabo cu a tuma luga na 1795 y tambe a bishita Damen Shiprepair, unda cu nan a haya un recorido masha extenso mes.
Dia Nacional
Manera un custumber riba tur himno di bandera, Corsou lo bay tin su serie di actividadnan rond di e isla y nos ta sigur cu e pareha real lo ta bishitando esakinan.
Pabien Corsou cu bo dia.
Foto: Gobierno di Corsou
