Dr. Izzy Gerstenbluth, den su funcion di director di Departamento di Epidemiologia y Ciencia Social di Corsou a anuncia un rato pasa cu entrante mañan nan ta cera frontera bek cu nan isla ruman, Aruba. Esaki pa motibo cu nos isla a bay den un situacion di “super spread” di Coronavirus y nan ta pronostica cu lo tin hopi caso lo bin afo na Aruba den e siguiente dianan. E experto, pa casualidad, esun cu a taha Aruba pa no habri frontera cu Merca, awe ta haya rason. El a bisa cu di ayera pa awe so, cu Aruba a raporta 30 caso extra, riba e 10 nan cu tabatin entre dialuna y diamars. Pues den apenas tres dia, Aruba a conta 40 caso activo extra di contagio local!
Nos ta lamenta cu ta for di Corsou mester haya e informacion aki pasobra na Aruba tur hende ta keto y aunke tin rumornan coriendo rond di ayera, aki DVG no a manda informa pueblo ainda. Transparencia den e caso aki ta escencial!
Den otro informe for di Corsou, ta parce cu Aruba ta esun cu tin e retonan mas grandi. Corsou mes a test 1930 hende for di dia cu Coronavirus a haci su entrada eynan. A descubri un total di 31 caso positivo di cual 28 a recupera, 1 a fayece y tin 2 caso activo cu ta nobo, pero ta casonan importa.
Na Sint Maarten tin 76 caso activo actualmente, un situacion alarmante. Y pio ainda, segun Dr. Izzy Gerstenbluth, nos pais ruman Sint Maarten parce di no tin capacidad di haci test tampoco. Pues e hecho cu tin 76 no kiermen cu ta esey ta e realida, sino cu e lo ta mucho mas, pero cu e hendenan no a test. Tin 2 persona hospitalisa actualmente na Sint Maarten.
E decision pa cera frontera cu Aruba no tabata facil pero segun e experto di Corsou, e ta necesario. E isla kier garantisa cu e ta cuida su ciudadanonan y un situacion manera contagio local pa loco, den club nocturno y bar y gym, no ta un scenario cu nan lo kier copia for di Aruba. Pesey, no solamente nan ta cera frontera pero lo controla tur hende cu a bin Aruba e ultimo dianan aki y cu a bay e sitionan ya conoci.
