E pandemia ocasiona pa e virus COVID-19 a trece un cambio drastico den nos economia y nos mercado laboral. En coneccion cu esaki Departamento di Labor & Investigacion (DAO) ta inventarisa e situacion laboral y den e cuadro aki ta acerca tur compania pa entrega
un Registro di Personal COVID2020. A base di articulo 30, prome inciso, di e Ordenansa Laboral 2013, un dunado di trabou ta obliga pa
entrega e Registro di Personal (Personeelsregister) na director di Departamento di Labor & Investigacion ora cu su persona haci un yamada na e compania.
Den e Decreto Nacional Registronan di Ordenansa Laboral 2013 ta regla e modelonan di e Registro di Personal. E Registro di Personal ta consisti di tres parti, Modelo 1A, unda ta yena e personal actual trahando/registra na bo compañia riba 30 juni 2020; Modelo 1B, unda ta menciona e necesidad di personal pa e ultimo mitar di aña 2020 (di juli 2020 pa december 2020), tumando cuenta di e situacion real di nos economia y Modelo 1C, na unda e necesidad di personal pa cada proyecto specifico den e ultimo mitar di aña 2020 ta wordo menciona.
Entrega di Registro di Personal COVID2020 ta obligatorio pa tur compania na Aruba y su periodo di entregamento ta extendi te cu 15 di september 2020. E unico forma cu por entrega e Registro di Personal COVID2020 ta den e forma digital. Desde 9 di juli 2020 por download e formulario digital, Registro di Personal COVID2020, cu ta consisti di 3 pagina for di website www.daoaruba.com of www.gobierno.aw of por haci un peticion via e-mail na [email protected] y DAO lo mail bo e formulario digital.
Den caso cu bo compania tin un of mas sucursal/ filiaal, DAO ta haci un peticion pa yena e Registro di Personal no solamente pa e oficina principal (hoofdvestiging) (p.e. kvk-nummer 5555.0) pero tambe pa cada sucursal/ filiaal (p.e. kvk-nummer 5555.1, 5555.2 etc.). Ta pidi tambe pa indica cua trahadonan ta rouleer door di pone un strea (*) den kolom patras di e kolom “No” riba e formulario digital. DAO ta informa cu ta obligatorio pa yena tur 3 modelo. Den caso cu no tin necesidad pa personal of necesidad pa personal pa cada proyecto specifico pa 2020, ta yena nihil ariba modelo 1B y modelo 1C.
DAO ta haci un peticion pa hinca e datonan den e formulario digital, segun e modelo stipula pa ley y manda nos esaki na e-mailadres [email protected] . DAO lo manda e compañia un e-mail como comprobante cu a ricibi e Registro di Personal COVID2020. Tene cuenta cu si bo a entrega e Registro di Personal 2019-2020, tambe bo mester yena atrobe e Registro di Personal COVID2020. Den caso cu e Registro di Personal COVID2020 no ta corectamente yena y DAO a comunica esaki na e compania pero e compania no a adapta e Registro di Personal, tambe ta considera cu e compania ta den incumplimento.
Pa companianan cu ta haci uzo di un intermediario (p.e. accountings- of adviesbureau) ta recorda nan cu cumplimento di nos leynan laboral ta un obligacion di e dunado di trabou y no di e intermediario. Companianan cu no ta cumpli cu entrega di e Registro di Personal den e periodo menciona como tambe esnan cu no a entrega esaki e aña anterior ta den incumplimento cu articulo 30 di e Ordenansa Laboral 2013. DAO lo bay over pa tuma accion contra esakinan despues di e fecha di 15 di september 2020.
Tene bon na cuenta cu den caso cu un Registro di Personal no ta corectamente yena y DAO a comunica esaki na e compania pero e compania no a adapta e Registro di Personal, tambe ta considera cu e compania ta den incumplimento. Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario.
E compania cu no cumpli cu e obligacion di entrega di e Registro di Personal COVID2020, lo ricibi un sancion administrativo di Afl. 5.000,-. Si tin mas pregunta tocante e Registro di Personal por tuma contacto cu un funcionario di Bureau Arbeidsmarktonderzoek na 523-7720 of manda un email na [email protected] of [email protected] y nan lo comunica cu bo.
