Despues cu 2 dia tras di otro a registra 5 caso positivo di Covid-19 na Aruba. Un bes mas ta escala e capacidad di test pa logra constata mas tanto caso posibel cu por ta positivo. For di 234 test haci ta keda registra 39 caso acerca hibando e cantidad di casonan positivo activo na 56 di cual 49 ta transmision cu a tuma luga localmente. Loke cu ta resalta entre esnan positivo ta cu mayoria ta bou e edad di 39 aña, dus personanan den nos comunidad cu ta hopi activo.
Mirando e cantidad di casonan cu ta keda registra y premirando cu e cifranan lo sigui subi, ta urgi comunidad pa atene nan mes na tur regla y medida ya stipula. E medidanan y reglanan ta conoci caba for di inicio di e pandemia y ta cuestion di cuminsa aplica nan bek estrictamente.
Aruba a stop e transmision di Covid-19 na un ocasion caba y hunto cu responsabilidad y disciplina nos por contene e transmision un bes mas.
E medidanan ta;
•Si bo ta malo y tin sintoma, keda cas y yama bo dokter di cas of 280.0101
•Si bo no por tin 1.5 meter di un otro persona uza un mondmasker
•Laba man frecuentemente cu awa y habon of uza hand sanitizer
•Evita mishi cu wowo, nanishi y boca
•No bay unda tin aglomeracion di hende ni tampoco aglomera.
Sigui e recomendacionnan cu ta wordo duna pa bo por proteha bo mes y bo sernan stima na cas. Bo salud ta bo responsabilidad cuid’e.
