Un rato pasa Departamento di Salud Publico (DVG) a publica e cifranan di awe, relaciona cu casonan di Coronavirus na Aruba. E bon noticia ta cu no tabatin ningun caso positivo mas, pa mas di un siman caba. Na tur a test 1731 hende na Aruba te cu awe, cu ta 10 caso mas cu ayera. E bon noticia ta cu tur test a sali negativo, pues un total di 1631. Aruba tin 0 caso pendiente, tin 2 morto, tin e mesun 100 casonan cu a test positivo, pero 81 pashent a recupera caba. E cantidad di hendenan den cuarentena a baha di 31 caso ayera pa 28 caso awe. E cantidad di casonan activo ta keda 17.
For di dia 13 di maart cu e prome caso di COVID-19 a keda registra na nos isla, como Departamento di Salud Publico di Aruba un di e tareanan tawata pa educa comunidad miho posibel riba con ta preveni di haya e virus y evita cu e ta sigui plama. Esaki a haci door di mantene un comunicacion a base diario cu comunidad. Danki na esfuerso di un y tur por bisa cu a logra mantene e transmision di e virus te cu awor na un nivel manehabel pa pais Aruba, pero e peliger no a pasa ainda….e lucha ta sigui!
Awor cu poco poco ta bay cuminsa laga comunidad bolbe bek na trabou, ta importante pa cada un di nos sigui aplica tur loke a siña den e “Normal Nobo”. E virus di COVID-19 no a disparce, e por parse manera cu el a bay pa un rato y despues e por tey atrobe. Mester adapta nos forma di biba pa ta consciente y proteha nos mes pa no hay’e y si hay’e mes pa nos no sigui plam’e. Pesey ta necesario pa cada uno di nos aplica tur medida basico di prevencion cu nos a siña durante di e ultimo simannan.
• Sea consciente di bo accion y su peliger pa cu bo salud y di bo famia
• Si bo ta malo no bay den publico pero consulta cu bo Dokter di cas tocante bo sintomanan
• Evita bay unda tin aglomeracion di hende
• Mantene distancia fisico di 2 meter for di otro persona
• Evita mishi cu wowo, nanishi y boca
• Evita mishi cu hopi articulo of superficie cu bo man
• Ora di saluda, no sunchi, brasa of boeks
• Laba man frecuentemente cu awa y habon of uza handsanitizer cu 60% di alcohol
Esakinan ta algun conseho basico cu Departamento di Salud Publico ta recomenda pa reduci e transmicion di e virus. Si cada un di nos sigui e consehonan menciona, lo por sigui maneha e cantidad di casonan na Aruba riba un minimo. E meta principal ta pa detecta un caso trempan, test, diagnostica, isola y identifica tur esunnan cu tabatin contacto cu e caso.
