Cool Casino a dal su portanan cera

3046

Corte a dicta un sentencia recientemente den cual a “ranca plug” di Cool Casino. Consecuentemente no a keda e doño Venezolano nada mas cu para operacion y cera su casino. Trahadonan awor ta den problema serio pasobra no tin entrada mas y lo depende di cesantia di SVb. “Nos a mir’e ta bin di masha dia”, tabata por lo menos comentario di por lo menos un di e trahadonan.

Cool Casino, maneha pa e compania ESF Gaming International N.V., situa na J.E. Irausquin Boulevard # 79, ta operacional desde juli 2010, pues casi 11 aña pasa. E doño y alabes director di e compania ta Esteban Sousa Freitas di Venezuela. E ultimo aki ta encabesa e compania desde augustus 2013.

E caso den corte tabata debi na debe grandi cu e compania tin cu Departamento di Impuesto pa su trahadonan, debe grandi di huur na RIU Hotels Aruba y sin lubida cu nan no ta cumpli cu un lista largo di regla y normanan impone door di Banco Central di Aruba. E magistrado no a haya responsabel pa mantene un compania asina habri, specialmente si mira e situacion economico di nos pais y cu e chens pa nan sali di nan debenan y tambe pa cumpli cu e reglanan existente ta limita.

Esaki ta di e tres casino cu ta dal su portanan cera memey di e pandemia aki. E prome tabata Excelsior Casino na Holiday Inn Beach Resort y sigui pa Eagle Aruba Casino, situa net banda di Eagle Aruba Beach Resort. Mayoria di e casinonan cu no ta pertenece na e hotel, pues cu ta di operadonan priva cu ta huur espacio den un hotel, awor ta pasando den problema serio. Mediado di Gobierno, Anselmo Pontilius a taha pa e tendencia aki for di lunanan atras caba, asina cu e pandemia a start. El a bisa cu, di su experiencia y conocemento, e casinonan aki tabata lucha caba prome cu e pandemia, pues awor lo bira practicamente imposibel pa wanta cabes riba awa.

E reto mas grandi awo ta pa e trahadonan, cu ta perde un entrada fiho memey di pandemia, cu chens masha limita pa por haya un otro trabou den casino mesora. Esey ta haci e proceso mas dificil y complica pasobra hopi di nan ta sinti cu gobierno a laga e situacion yega mucho leu prome cu e interveni y evita lo peor.

Di otro banda, parce cu Alfredo Lowenstein, doño di Holiday Inn Resort ta evaluando pa e mes habri e casino na su hotel bek. Excelsior Casino, cu tambe tabata den man di operadonan priva no a logra sobrebibi e sla di Coronavirus. Apenas e casino mester a cera cu nan a mira un bon chens pa dal henter e operacion cera y manda tur hende cas. E otronan a opta pa purba toch pero tampoco no a dura mucho pasobra ningun hende por keda paga huur por ehempel pa un casino cu tin 0 entrada pa luna. Hopi biaha mester tene cuenta cu salario ta apenas un parti di e gastonan di un compania.

No ta conoci si RIU Hotels lo opta awo pa nan mes habri e casino y nan mes oper’e pasobra pa haya un otro huurdo den e momentonan aki lo ta masha dicifil.