Ariba Dia di Mama Tera, 22 di april 2024, Gobierno di Aruba a tuma un paso significante den su compromiso cu cuido ambiental y accion climatologico lansando e Conseho Nacional di Resilencia Climatico. E anuncio aki tabata un momento clave durante e Earth Day Forum, marcando asina un momento determinante den Aruba su trayecto pa converti su mes den un “Climate Resilient Small Island State” (CRSIS).
Un CRSIS ta referi na un nacion insular chikito cu ta resiliente na impactonan causa pa cambio climatologico. E tipo di nacionnan aki ta particularmente vulnerabel na efectonan negativo di cambio climatologico, manera aumento di nivel di lama, aumento den frecuencia di eventonan meteorologico extremo, y cambio den patronchi di awasero cu por menasa nan ambito fisico, economico y social. Estadonan insular chikito, manera Aruba, ta enfrenta retonan unico cu ta menasa nan existencia cu cambio climatologico.
Mandato y Obhetivonan di e Conseho NCRC lo dedica su mes na:
1. Desaroya un cuadro di resiliencia nacional climatologico respalda pa legislacion climatologico.
2. Coordina evaluacionnan di riesgonan climatologico y avansa investigacion climatologico.
3. Mehora e capacidadnan institucional pa fortalece e adaptacion climatologico.
4. Identifica y mobilisa financiamento climatologico pa facilita proyectonan climatologico substancial.
5. Promove alfabetisacion climatologico y integra educacion climatologico.
Principionan Fundamental
• Impulsa pa Resiliencia: Mehora e sinergia y resiliencia di Aruba su ecologia, comunidad y sistema gubernamental.
• Enfoke ariba Henter e Nacion: Enfatisa un enfoke holistico pa incorpora e resiliencia climatologico den tur proceso gubernamental y manehonan nacional.
• Inclusividad: Involucra tur sector den e creacion di solucionnan di servicionan climatologico y procesonan di tumamento di decision.
• Husto: Sigura cu accionnan di resiliencia climatologico ta husto y ta considera esnan mas vulnerabel.
• Anticipando: Implementa solucionnan proactivo pa anticipa y mitiga menasanan climatologico prome cu nan sosode.
Plataforma y Participacion:
NCRC lo haci uzo di e ‘Climate Quintet’ (CQ) involucrando stakeholders clave:
• Sector publico y companianan estatal.
• Sector priva y asociacionnan industrial.
• Organisacionnan civico y fundacionnan no gubernamental.
• Institucionnan cientifico y academico.
• Agenciannan regional y internacional.
E iniciativa aki ta mas cu un medida di maneho; e ta un compromiso cu e futuro di nos isla y un reaccion proactivo na retonan di cambio climatologico global. NCRC lo traha duro pa sigura cu tur sector di sociedad por resisti adversidadnan climatologico y prospera den un mundo cu ta cambiando.
