Conocido cantante Spaño Camilo Sesto a fayece

E cantante Spaño, Camilo Sesto a fayece diadomingo mainta na edad di 72 aña, segun su cuenta oficial di Twitter a anuncia.

“Nos ta lamenta hopi di anuncia cu nos gran y kerido artista Camilo Sesto, a caba di laga nos,” e mensahe ta bisa, unda cu ta desea e Alicantino descansa na paz, sin detaya e causa di su morto.

Camilo Sesto a alcansa su estreyato den añanan 70 y 80, considera como un di e cantantenan mas popular di e idioma Spaño di tur tempo, loke cu a dun’e na 2011 e medaya na e Maximo orguyo Hispano. Despues di a retira for di escenario na 2008, seis aña despues el a bolbe cu un gira den America Latina y Merca.

Desde cu na 1972 el a ricibi su prome Disco di Oro na Argentina, su fama na Latinoamericano no a stop di crece, cu giranan constante den Chile, Venezuela of Mexico, unda cu na 1983 el a realiza un decena di galanan benefico.

Na 2018, el a publica loke lo ta su ultimo album, “Camilo sinfonico”. Ta calcula cu su benta a supera 70 miyon di copia. Famoso pa temanan manera “Vivir asi es morir” y “Algo de mi”, tambe el a compone cancion pa artistanan di gran renombre manera Miguel Bose, Angela Carrasco, Lani Hall of Audrey Landers.

E cantante a wordo hospitalisa aña pasa pa problema di piedra na riñon.

 

Comments

comments