Condicion pa prestamo: Maneho financiero di Aruba ta bay cay bou Hulanda

6662

CFT a yega na e conclusion positivo pa duna e di tres tranche pa juli, augustus y september cu ta 204 miyon florin. E ta cubri necesidad financiero di Gobierno, FASE, Loonsubsidie y gastonan di Gobierno. Esaki ta loke cu Prome Minister Evelyn Wever Croes a bisa den conferencia di prensa awe mainta.

Loke no ta inclui den esaki ta e 5 miyon pa AZV, y e di dos suma cu no ta inclui den e suma aki ta un pot di inversion di 40 miyon florin. E colegio CFT a conseha pa no dun’e pa mira con e 40 miyon por sirbi den reactivacion di economia. Segun e mandatario a bisa, esaki ta pa mantencion di ekiponan manera planta di reciclahe di riool, entre otro.

Pa haya e tranche Hulanda a pone un condicion dia 18 di mei cu ta creacion di un entidad nobo cu mester bini pa maneha e placa aki. Gobierno a haya straño cu despues di e anuncio ey no a tende nada mas. Sinembargo no a tende nada mas di e condicion aki. A reuni cu Gobierno di Hulanda pero nada. Diahuebs ultimo tabatin reunion cu Minister Raymond Knops, kende a priminti di lo manda detaye pero no a haya nada mas te cu awe mainta.

Pero ayera diadomingo a haya yamada di secretaria di Knops kende a informa cu Hulanda a pone un condicion nobo pa e siguiente tranche di ayudo. Despues a papia cu Knops pa basta largo y a mustr’e cu Aruba ta cumpliendo cu tur loke a pidi, pa cual motibo ta haya e ayudo pa 3 luna y no un luna manera e otro islanan. Pakico bay den un regimen cu no ta funcionando manera ta e caso cu Sint Maarten, Aruba no ta compronde. Pues e deseo di Gobierno di Hulanda ta pa introduci “Rijks Financieel Toezicht”

E ta un consensus rijkswet cu mester bay di acuerdo cu ne pero si no acepta e condicion aki, lo no haya e prestamo. Pa e condicion di introduccion di RFT, mester haci rondanan di consulta, inclusive cu Parlamento, prome cu acepta e condicion of rechas’e. “E Gobierno aki no ta permiti ningun forsa ajeno pa destrui economia, manera cu a haci na Corsou,” Prome Minister a bisa. Pues henter e siman aki ta bay tin rondanan di consulta prome cu e fecha di 3 di juli, ora cu Conseho di Minister di Reino reuni riba e tema aki. E mandatario a bisa cu e ta sinti cu “Hulanda a pone nos lomba contra muraya.”