Aruba Marriott un biaha mas tin un storia heroico pa comparti, unda cu tres di su asociadonan (trahadonan) a salba bida di un huesped cu a hera hoga, pa cual a nomin’e pa un Chairman’s Award.
HEROE SIN CAPA
Shurwensly Geertruida ta traha como Loss Prevention Officer pa un aña y mey na Marriott Surf Club y riba un 29 di maart, parti mainta, el a ricibi un yamada pa un huesped di e hotel cu lo a hay’e den problema den awa. E tabata e prome n’e sitio y el a pidi algun di e otro huespednan rond di dje pa yud’e pa saca e huesped for di awa. Tambe el a pidi pa su coleganan trece e ‘first aid tank pa asina duna e huesped oxigeno, ya cu el a guli hopi awa. Di biaha el a sigui pa duna CPR riba e huesped.
Shurwensly a bisa cu e no a duda niun rato y cu e tabata sa kico pa haci, pa motibo cu ta tur aña nan ta haya training di con pa actua den un caso asina. E tabata sa cu e prome cos cu e mester haci ta pa saca e persona for di lama y aplica CPR riba dje.
ANTHONY SCHOLTEN
Anthony tin nuebe aña trahando na Marriott Hotel como Loss Prevention Officer. Rib’e dia aki, 29 di maart, tabata e di dos cu a yega n’e sitio despues di a ricibi un melding di cu tin un huesped di nan cu a hay’e cu problema den awa. Hopi orguyo el a conta cu ora el a yega ya caba Shurwensly a saca e huesped for di awa y tabata bezig caba cu ne. El a aplica prome auxilio riba dje, en espera pa Anthony yega cu a tanki di oxigeno.
Manera cu Shurwensly a indica previamente, tur aña nan ta ricibi training extensivo di prome auxilio y nan tabata sa kico pa haci ora cu nan a yega n’e sitio. Segun Anthony a relata, el a yega di pasa den varios di e sustonan asina caba y nan tabata sa cu nan mester mantene nan mes calma p’asina por yuda scapa bida di un persona. E no a perde cabes, dus e no a bira nervioso, pero si el a sinti su mes tristo pa motibo cu e huesped tabata hopi malo. El a mantene su mes profesional y tabata haci oracion pa Dios por scapa bida di e cabayero aki, cu tabata tin su casa – y yiunan tabata yora rond di dje.
Anthony ta bisa cu ta danki na tur e sesionnan di training di aplicacion di CPR, cu ta algo obligatorio di Marriott Resort cu nan tabata sa exactamente cual procedura nan mester a tuma pa por a scapa e huesped aki. Un di e proceduranan ta pa yama un supervisor.
MARCEL MADURO
Marcel Maduro tin 11 aña trahando na Marriott Surf Club y su funcion ta Loss & Prevention Supervisor. El a conta pa e dia aki, 29 di maart, el a ricibi un yamada for di su coleganan cu tabata tin un turista cu a hay’e cu problema na beach. Ora cu el a yega n’e sitio, el a wak cu ya caba su colega Shurwensly a sigui tur protocol y cu e tabata trahando caba riba e turista cu no tabata reacciona. Mientras tanto, a yama ambulance pa asina tuma over di e asociadonan (trahadonan) di Marriott Aruba Surf Club
N’e sitio el a papia cu casa di e huesped, pa asina saca informacion si e turista lo por tin cualkier condicion medico pa nan por pasa over na e personal di ambulance. E ta gradicido cu ora cu ambulance y polis a yega den un tempo record y asina den un rat’i ora e personal di ambulance a cuminsa traha cu e huesped y a logra haya un pulso pa nan por transport’e pa hospital.
Marcel ta sintie hopi contento ya cu e coordinacion entre su coleganan a bay fantastico, ya cu tur cos a cana bon, segun e procedura.
IMPORTANCIA DI UN FIRST AID TRAINING
Marcel a sigui bisa cu un training di first aid nunca ta di mas. Nunca bo no ta cla p’e. Un yamada asina por drenta na cualkier momento. Den nan caso, esaki a resulta den un bida di un persona salba. No ta importa si ta local of turista, pero e importancia ta cu nan tabata por a salba bida di un ser humano.
MENSAHE
Pa su dos coleganan, el a bisa di ta super orguyoso con nan a handle e situacion. Danki cu nan a keda calmo y a mantene ‘cabes friu’, cu awe e turista aki por ta na bida y gosando di bon salud.
RUTHLINE THEYSEN
Marriott awendia tin tres heroe den cas, Ruthline Theysen a cuminsa bisa. E ta Complex Director di Human Resources di Aruba Marriott. Mescos cu Marcel, e tambe ta orguyoso di su coleganan cu a yuda scapa bida di un persona. Esaki ta demostra con Aruba Marriott y Marriott International ta cuida di su asociadonan pa nan haya tur ekipo y herment pa por brinda e servicio aki cu ta di cuida tur hende.
AWARD
E tres heroenan aki a ricibi un Chairman Award, presenta personalmente pa Bill Marriott, Presidente Ehecutivo di e cadena di hotelnan Marriott. E ta un reconocimento den e region pa a salba bida di un huesped.
Ruthline un biaha mas enfatisa e importancia pa tur asociado (trahado) di Loss & Prevention, cual ta mas o menos 60, ta certifica anualmente pa CPR, Emergency Rapid Respone (ERR) y First Aid (Prome Auxilio), cual ta obligatorio. Tambe tur supervisor ta ricibi un certificado como un ‘Emergency Medical Responder’ anualmente.
Marriott Resort tur aña ta tene training anualmente pa tur asociado (trahado) ta certifica den caso cu algo pasa riba e propiedad, sea por ta un asociado (trahado), un guest (huesped) of un bishitante di e propiedad.
