Diahuebs den oranan di atardi un grupo di comerciante chikito di e bario di Pos Chiquito a expresa nan preocupacion pa e forma cu nan ta sinti nan mes perhudica.
A splica cu Green Corridor ta un bunita proyecto pero alabes a percura pa daño tambe cu nan ta sinti cu falta di entrada pa nan negoshi. Desde diseño di Green Corridor a cera practicamente tur caminda cu ta bay na banda y a laga solamente algun crusada grandi habri. E consecuencia di esaki ta wordo sinti principalmente door di comerciantenan na Pos Chiquito parti pariba, unda no tin un punto unda esnan cu ta bini di Playa por baha y bay cerca nan sino mester pasa completamente rond.
No solamente esey practicamente no a laga espacio di parkeer na e negoshinan. Asina por ehempel Rey Hing Supermarket mester a pasa den basta dolor di cabes pa haya algun espacio su dilanti pa parkeer. Asina mes e negoshi a cay drasticamente compara cu antes, ora cu e autonan tabatin un entrada su dilanti. E clientenan ta prefera pa sigui core y yega Savaneta, unda si por baha na banda.
Negoshinan cu a keda perhudica ta Oduber Welding Shop, Elgina Cleaning, JaySanne Boutique, Laboratorio Familiar, Tia Rosa Snackbar, Franco Barbershop, JJ LOttery, Rey Hing Supermarket, dos oficina di dokter y Botica Aloe. “E Green Corridor a mata e comerciantenan aki,” un di e comerciantenan a expresa.
E grupo tin un plan cu nan a presenta na e mandatario concerci. Nan ta spera cu DOW por sinta cu nan y scucha nan sugerencianan. “Nos kier atencion y nos kier solucion,” a wordo bisa. Nan a bisa cu solamente mester entrada pasobra salida, nan por uza e parti patras. Algo manera cu a haci na Young Fellow.
E situacion reinante a pone cu un di e negoshinan a cera su porta y ta poni pa wordo poni den un bid publico. Di e forma aki comercio chikito no por crece.
Pedro Kock doño di un edificio chikito cu diferente negoshi den dje a bisa cu loke nan a haci cu Pos Chiquito ta un crimen. “Nan a masacra tur negoshi di Pos Chiquito. Nos ta pidi atencion di Gobierno y instancianan concerni, pa saca un man pa yuda comerciantenan di Pos Chiquito cu a sufri hopi daño. Nos kier entrada pa ambos banda, pa alivia e situacion,” Kock a bisa.
Banda di e problema ariba menciona, a kita tur posibilidad pa staciona, poniendo baranca, cu ta stroba clientenan di staciona y drenta un di e negoshinan. Esaki no ta husto, Kock a bisa.