Diaranson ultimo a tuma luga un evento organisa pa Comerciante Uni Aruba (CUA) den Gloria. Aki ta caminda a introduci nan aplicacion nobo cu tin hopi beneficio pa tur nan miembronan. Frans Ponson ta presidente di CUA y durante un entrevista cu representante di Headlines Group, kende t’e cas editorial di 24ora.com y TREMPAN, a conta cu; no ta trata di un evento grandi sino un anochi pa elabora riba e plataforma cu Comerciante Uni a traha na beneficio di su miembronan.
Claro, tabatin espacio pa netwerk tambe entre e comerciantenan. E ta nan ultimo encuentro pa aña 2023, e miembronan a bin hunto pa vocifera nan preocupacion y comparti idea.
CUA ta publica tur documento cu nan ricibi y cu ta na beneficio di e comerciantenan. Pues, por pensa aki riba ley nobo, maneho di gobierno, documento di turista cu ta drenta, investigacion y mucho mas. E ta un aplicacion caminda por ricibi y comparti informacion.
Apart di e portal di ricibi y comparti informacion, tin un seccion caminda por “chat” cu otro. Un comerciante por lansa su pregunta of preocupacion y otro por reacciona riba dje y comenta con el a resolve mesun problema ey of di ki forma por resolv’e y kisas hasta ken por yud’e resolve.
Den CUA, ta conta cu fiscalista, abogado, dokter y persona den tur area di trabou.
E idea ta pa uza e plataforma mas y mas. Por uz’e trankil sin ningun problema. Ora e preocupacionnan bira grandi, na nan turno CUA mes lo atende esaki cu gobierno.
Durante e evento di CUA, a mira cu na comienso cu durante e netwerk ya a cuminsa papia di posibel deal cu por cera hunto. Pa locual t’e app mes, tin un seccion estilo Facebook caminda bo por market bo producto. Pues bo ta publica bo servicionan y asina ta sigur cu tur persona cu tin acceso na e app, por mir’e y haci uzo di bo servicionnan tambe.
“Ley pa un ley pa tur”, ta CUA su lema for di comienso. Locual a nota si, ta cu, durante e ultimo lunanan, e miembresia a crece. Awo ta posibel hasta pa postula bo mes como miembro di directiva, di cual e miembronan lo vota pa esunnan cu postula nan mes.
