E situacion den Caya G.F. Betico Croes, miho conoci como Caya Grandi, pa algun ta mustra cu e ta bayendo den malo pa pio ultimo tempo. Comerciante den caya grandi, Frank Tieleman ta afirma cu deterioracion ta sigui den Caya Grandi na Oranjestad y no a bini nada pa yuda stop e exodus di Caya, nada no a bin, no tin ningun cambio.
Mas pabao tabata tin algun negoshi cu tabata haciendo nan intento unda por a mira berdad cu tabata tin poco mas movecion pero awor hasta Mango a cera, e comerciantenan grandi a bay anto e chikitonan no lo sobrevivi dus nan tambe ta saliendo bek. Minister Wever ta purbando incentiva comerciantenan pasobra ta parcela priva cu gobierno no por mete. Pero di su parti gobierno ta bisa di purba drecha e luga un poco, pone camara, anto e pregunta ta si esaki ta algo cu lo yuda. “Den e fase aki esey no ta yuda mas. Pasobra bo bay pone luz esey no kiermeen cu mas cliente lo bin den caya. Si no tin comerciante pa cumpra cos, hendenan no ta bin caya paso no tin nada mas pa bin cumpra.”
Tieleman ta bisa cu mester bin cu otro tipo di incentiva, entre otro fiscal, pero bo ta cuminsa na atrae comerciante bek den caya. Anto bo tin cu yena e puzzel riba kico lo bay atrae comerciante pa bin den e area aki cu nan negoshi y no na skina di cualkier otro crusada. Unabes bo tin esey bo ta dedica na kico lo pone e cliente bin Caya y no bay otro banda. “Ehempel tin hopi, mi a bisa esey hopi biaha caba. Ultimo añanan a bin algun – si bo kier yama nan incentiva – cu no a funciona den nada positivo pa caya pasobra pio e ta birando.”
Minister Wever a papia tambe riba busca inversionista nobo for di Hulanda. Tabata tin un area di condominio cu un compania Mexicano lo kier a haci por ehempel, anto awor mester wak si e tipo di proyectonan aki lo por ta un solucion pa Caya. “Por ta, tin varios inversion a tuma luga y varios edificio ta bendi. Pero tur e proyectonan ta pega, mi ta kere nan tambe ta wardando riba kico ta cambiando.
Kico lo yuda incentiva pa nan por cuminsa cu e proyecto.” Si esey ta locual minister ta purba busca, dus inversionista nobo for di Hulanda, ta un bon stap segun e comerciante. Pero mester haci mas pa por backup cu incentiva riba pa kico of con lo convence pa cumpra edificionan den caya. Mayoria edificio ta den masha mal estado mes y no tin nada riba horizonte cu ta bisa ki tipo di plan tin pa caya, no tin nada of nan ta haciendo algo y no ta pasando e informacion aki. “Pero ami no a tende nada nunca.”
