Awe pueblo Dominicano rond mundo ta celebra e 208 aniversario di fecha nacemento di e estadista Dominicano Juan Pablo Duarte.
Winston Tavarez, presidente Fundacion Dominicana Arubanse Juan Pablo Duarte, hunto cu Consulado di Republica Dominicano, Grupo Folklorico Cultural Dominicano y Brigada di Bombero di Caribe a bini hunto pa pone un ofrenda floral na e busto di Juan Pablo Duarte, banda di hospital bieu.
Fechanan riba cual e fundacion ta rindi tributo na Juan Pablo Duarte ta ta 27 di februari (Dia di Independencia) y 16 di augustus (Dia di Restauracion).
E prome celebracion di e fundacion tabata 21 di januari cu ta fecha di Virgen di Altagracia. Riba e dia ey a tene un servicio religioso na misa na Playa.
Ramon Valdez Hernandez y Sidro Tavarez, lidernan di “Equipo Azul PRM Aruba” a rindi honor na Juan Pablo Duarte. Ta pa prome biaha cu e organisacion aki ta organisa un ceremonia pa ponemento di krans. Den e homenahe aki haci entrega di banderin, mirando cu otro luna ta conmemora na Republica Dominicana e luna di “patria” cu celebracion di entre otro Dia di Bandera y Dia di Independencia. P’esey ta entrega e banderin pa nan core cu ne rond.
Ambos organisacion a expresa di ta masha agradecido na e pueblo y gobierno cu a otorga un espacio pa pone un Plasa unda ta rindi honor na e gran lider Dominicano.
